رحمان ملک کا حکومت سے کورونا وائرس کے خلاف کوششیں تیز کرنے کا مطالبہ

 سینیٹر رحمان ملک نے وفاقی حکومت سے کورونا وائرس کے پھیلاؤ کے خلاف کوششیں تیز کرنے کا مطالبہ کرتے ہوئے کہا ہے کہ  حکومت کورونا وائرس کے پھیلاؤ کیخلاف  غیر سنجیدہ رویہ ترک کرکے عملی اقدامات اٹھائے۔

وفاقی دارالحکومت اسلام آباد میں میڈیا سے گفتگو کرتے ہوئے سینیٹر رحمان ملک نے کہا کہ عالمی ادارہ صحت نے کورونا وائرس کو وبائی بیماری قرار دیا ہے لیکن ہماری کوششیں ناکافی ہیں۔ کورونا وائرس کے پیش نظر کرکٹ میچ نہیں روکے  جا رہے۔کیا عوام کی صحت سے چند کاروباری حضرات کے مالی فوائد زیادہ اہم ہیں؟ 

گفتگو کے دوران سینیٹر رحمان ملک نے کہا کہ حکومت عوام کی صحت سے کھیلنا بند کرے۔30 مارچ تک ملک بھر کے تمام تعلیمی ادارے بند اور کھیلوں کی تمام سرگرمیاں معطل کی جائیں۔ ملک بھر میں دفعہ 144 نافذ کیجائے جسکے تحت 10 سے زائد افراد کے جمع ہونے پر پابندی عائد ہو۔

سینیٹر رحمان ملک نے مطالبہ کیا کہ سینیٹ ، قومی اسمبلی ، اور تمام صوبائی اسمبلیوں کے اجلاس 30 مارچ تک نہ بلائے جائیں۔کورونا  وائرس جیسے معاملے پر صوبوں اور فیڈریشن کے مابین الزام تراشی کا کھیل بند ہونا چاہئے۔وفاق اور صوبائی حکومتوں کو الزام تراشی کی بجائے مل بیٹھ کر قومی لائحہ عمل تیار کرنا چاہئے۔ 

رحمان ملک نے کہا کہ حکومت فوری طور پر کوروناوائرس کے ممکنہ پھیلاؤ سے نمٹنے کیلئے نیشنل ایکشن پلان تیار کرے۔کراچی میں والدین سے کہا جارہا ہے کہ کورونا وائرس سے متاثرہ بچوں کو سکول نہ بھیجا جائے۔کراچی میں بچوں کے والدین کو  غیر سنجیدہ احکامات جاری کرنے والوں کو معطل کیا جائے۔