پرویز الٰہی یا حمزہ شہباز؟ پنجاب اسمبلی میں نئے وزیر اعلیٰ کا انتخاب آج ہوگا

لاہور:  اراکینِ پنجاب اسمبلی آج ووٹنگ کرکے اپنے نئے وزیر اعلیٰ کا انتخاب کریں گے جبکہ وزارتِ اعلیٰ کیلئے 2 امیدواروں پرویز الٰہی اور حمزہ شہباز نے کاغذاتِ نامزدگی جمع کرادئیے ہیں۔ 

تفصیلات کے مطابق آج پنجاب اسمبلی کے اجلاس میں وزیر اعلیٰ کا انتخاب ہوگا۔ دونوں امیدواروں میں مقررہ وقت میں کاغذاتِ نامزدگی حاصل کر لیے تھے۔ اسکروٹنی کے دوران پرویز الٰہی اور حمزہ شہباز کے کاغذات درست قرار پائے۔

یہ بھی پڑھیں:

آج قوم کیلئے یومِ نجات ہے، احتجاج پارلیمانی حدود میں ہونا چاہئے۔سعد رفیق

چوہدری پرویز الٰہی نے اسپیکر پنجاب اسمبلی کے طور پر ایوان کی خدمت کی ہے جو ق لیگ کے مرکزی رہنما ہیں جبکہ اپوزیشن لیڈر پنجاب حمزہ شہباز کو ن لیگ کی جانب سے وزیر اعلیٰ کے عہدے کیلئے امیدوار نامزد کیا گیا ہے۔

قبل ازیں وزیر اعلیٰ پنجاب سردار عثمان بزدار نے اپنے عہدے سے استعفٰی دے دیا تھا جو لکھا تو وزیر اعظم کے نام گیا تھا، تاہم گورنر پنجاب نے اسے منظور کر لیا جس کے بعد پنجاب اسمبلی تحلیل ہوگئی۔ آج نئے صوبائی وزراء کے نام بھی سامنے آنے کا امکان ہے۔

جہانگیر ترین گروپ سے ق لیگ کے مرکزی رہنما مونس الٰہی نے 2 روز قبل ملاقات کی تھی جو بے نتیجہ ثابت ہوئی تاہم گروپ نے ن لیگی رہنما اسحاق ڈار سے مذاکرات کامیاب ہونے کے بعد حمزہ شہباز کی حمایت کا اعلان کیا تھا۔