پنجاب اور خیبر پختونخوا کا بجٹ پیش کرنے کیلئے صوبائی اسمبلی اجلاس کل طلب

لاہور: صوبائی کابینہ میں اضافے کا امکان سامنے آگیا، پنجاب اسمبلی کا بجٹ اجلاس 13 جون کو طلب کیا گیا ہے۔

تفصیلات کے مطابق وزیر اعلیٰ پنجاب حمزہ شہباز کی کابینہ تاحال نامکمل ہے۔ بہت سی اہم وزارتوں کے سربراہان نے تاحال حلف نہیں اٹھایا۔ پنجاب کابینہ میں کم و بیش 25 مزید وزراء کی حلف برداری کا امکان ہے۔

یہ بھی پڑھیں:

موجودہ بجٹ کو آئی ایم ایف نہیں مانے گا،عمران خان

بجٹ تجاویز کے مطابق پنجاب کے عوام پر کوئی نیا ٹیکس عائد نہیں کیا جائے گا۔ کم آمدنی رکھنے والے افراد کو بجلی کے بلوں کی ادائیگی میں رعایت دی جائے گی۔ آٹے کی کم قیمت کیلئے پیکیج بھی جاری رہے گا۔

اسپیکر پنجاب اسمبلی چوہدری پرویز الٰہی کی زیرِ صدارت پنجاب اسمبلی کا بجٹ اجلاس کل 13 جون کے روز طلب کیا گیا ہے۔  اسمبلی سے صوبائی بجٹ کی منظوری حمزہ شہباز حکومت کیلئے بڑا چیلنج ہوگی۔

صوبائی ترقیاتی بجٹ کا حجم 685ارب روپے رکھا گیا ہے۔ دوسری جانب اسپیکر پرویز الٰہی نے حمزہ شہباز حکومت پر الزام عائد کیا ہے کہ بجٹ اجلاس کی تیاری کرنے والے اسمبلی اسٹاف کو گرفتار کیا جارہا ہے۔

اسپیکر پرویز الٰہی نے کہا کہ پنجاب پولیس بجٹ اجلاس کی تیاری کرنے والے اسٹاف کو بے جا ہراساں کر رہی ہے۔دوسری جانب خیبر پختونخوا اسمبلی میں بھی صوبائی بجٹ پیر کے روز پیش کیا جائے گا۔

خیبر پختونخوا اسمبلی کا بجٹ اجلاس سہ پہر 3 بجے پشاور میں شروع ہوگا۔ قبل ازیں وزیرِ خزانہ مفتاح اسماعیل کا کہنا تھا کہ ماضی میں حکومت نے ملکی معیشت کو بھاری نقصان پہنچایا جس کے تدارک کی ضرورت ہے۔