نئے وزیر اعلیٰ کا انتخاب، پنجاب اسمبلی کا اجلاس آج شام کو طلب

لاہور: ڈپٹی اسپیکر نے تاریخ بدل دی، پنجاب اسمبلی کا اجلاس آج شام کو طلب کیا گیا ہے جس میں اراکین کو شرکت یقینی بنانے کی ہدایت کردی گئی۔صوبائی اسمبلی کے اجلاس میں نئے وزیر اعلیٰ کا انتخاب کیا جائے گا۔ 

تفصیلات کے مطابق پنجاب اسمبلی کا اجلاس 16 اپریل کوطلب کیا گیا تھا، تاہم ڈپٹی اسپیکر پنجاب اسمبلی دوست مزاری نے ایوان کا اجلاس آج شام 7 بج کر 30 منٹ پر طلب کیا ہے۔ اسمبلی سیکرٹریٹ نے نوٹیفکیشن جاری کردیا۔

یہ بھی پڑھیں:

عمران خان نے این ایس سی کو سیاسی فائدے کیلئے استعمال کیا، خط دھوکہ ہے، مریم

وزیر اعلیٰ پنجاب کیلئے ن لیگ کے امیدوار حمزہ شہباز اور ق لیگ و پی ٹی آئی کے مشترکہ امیدوار پرویز الٰہی کے مابین مقابلہ ہوگا۔ حمزہ شہباز نے اراکین کو لاہور نہ چھوڑنے کی ہدایت کی ہے جس کا مقصد ووٹنگ میں حصہ لینے کو یقینی بنانا ہے۔

پنجاب اسمبلی میں آئین کی دفعہ 130 کے تحت نئے وزیر اعلیٰ کا انتخاب عمل میں لایا جائے گا۔ حمزہ شہباز نے ن لیگی اور اتحادی اراکین کو شہر سے باہر جانے سے روک دیا ہے۔ پرویز الٰہی بھی وزیر اعلیٰ بننے کیلئے میدان میں آگئے ہیں۔

واضح رہے کہ پنجاب اسمبلی میں وزیر اعلیٰ کے انتخاب کیلئے ق لیگ، پی ٹی آئی اور ن لیگ سمیت تمام سیاسی جماعتوں کے اراکین ووٹنگ کریں گے۔ آئین کے تحت وزیر اعلیٰ کا انتخاب سادہ اکثریت کے اصول سے عمل میں لایا جاتا ہے۔