پی ٹی آئی نے فیٹف پر محنت کی، کریڈٹ لینے کیلئے مشترکہ حکومت آگئی، شاہ محمود قریشی

اسلام آباد: پاکستان تحریک انصاف کے وائس چیئرمین اور سابق وفاقی وزیرِ خارجہ شاہ محمود قریشی نے کہا کہ فیٹف کے حوالے سے ساری محنت پی ٹی آئی نے کی اور کریڈٹ لینے کیلئے مشترکہ حکومت آگئی۔

تفصیلات کے مطابق اپنے ایک بیان میں شاہ محمود قریشی نے کہا کہ جس وقت ہم فیٹف پر قانون سازی کررہے تھے تو پیپلزپارٹی اور (ن) لیگ گریزاں تھیں، ہم نے دونوں کو قائل کرنے کی کوشش کی تو انہوں نے این آراو 2 رکھ دیا، دونوں جماعتوں نے شرط رکھی تھی کہ ہمیں نیب کیسز میں ریلیف ملے گا تو ساتھ دیں گے۔

شاہ محمود قریشی نے کہا کہ فیٹف کے حوالے سے ایکشن پلان سے لے کر اُس کی منصوبہ بندی، انتظامی اقدامات اور قانون سازی پی ٹی آئی دورِ حکومت میں ہوئی ہے، اب حکومت آج کس بات کا کریڈٹ لینے کی کوشش کررہی ہے۔

یہ بھی پڑھیں:

نالائق ٹیم ملک کو کورونا عذاب میں نہ مبتلا کردے، فواد چوہدری کو خدشہ

پی ٹی آئی رہنما کا مزید کہنا تھا کہ حماد اظہر، وزارت خزانہ اور وزارت خارجہ نے مل کرمتفقہ لائحہ عمل اپنایا، عسکری ادارے کے متعلقہ حکام اور اسٹیٹ بینک کے لوگوں نے بہت تعاون کیا، فیٹف نے جتنے بینچ مارک متعین کیے، ہم نے ان پر تسلی بخش پیش رفت کی۔

علاوہ ازیں شاہ محمود قریشی نےامید ظاہر کی کہ فیٹف ٹیم اپنے وزٹ کے دوران مثبت پیش رفت دیکھتے ہوئے مثبت فیصلہ کرے گی۔