تحریکِ انصاف کا 26 اپریل کو الیکشن کمیشن دفاتر کے سامنے ملک گیر احتجاج کا اعلان

اسلام آباد: پی ٹی آئی نے 26 اپریل کو منگل کے روز الیکشن کمیشن دفاتر کے سامنے ملک گیر احتجاج کا اعلان کیا ہے۔ تحریکِ انصاف کے رہنماؤں کاکہنا ہے کہ ملک بھر میں الیکشن کمیشن دفاتر کے سامنے مظاہرے کیے جائیں گے۔

تفصیلات کے مطابق تحریکِ انصاف کے میڈیا معاملات کے سربراہ اور سابق وزیرِ اطلاعات فواد چوہدری نے کہا کہ ہم صرف الیکشن کمیشن کے دفاتر کے سامنے احتجاج کریں گے۔ اس حوالے سے ضلعی کارکنان و رہنماؤں کو بھی ہدایات جاری کی جائیں گی۔

یہ بھی پڑھیں:

عمران خان نے قوم کی عزت سمیت ہر چیز بازاری بنا دی۔احسن اقبال

واضح رہے کہ تحریکِ انصاف متعدد مرتبہ الیکشن کمیشن پر جانبداری کا الزام عائد کرچکی ہے۔ اسلام آباد ہائیکورٹ کے حکم پر فارن فنڈنگ کیس کی سماعت روزانہ کی بنیاد پر کرنے پر بھی پی ٹی آئی رہنماؤں نے اعتراض اٹھایا اور معاملہ ہائیکورٹ پہنچا دیا تھا۔

پی ٹی آئی کی جانب سے اسلام آباد ہائیکورٹ میں درخواست دائر کی گئی ہے کہ دیگر 17 سیاسی جماعتوں پر بھی فارن فنڈنگ کے الزامات عائد ہیں۔ اگر پی ٹی آئی کے مقدمے کو ایک ماہ میں نمٹانا ہے تو دیگر سیاسی جماعتوں کے مقدمات بھی اسی عرصے میں نمٹائے جائیں۔

الیکشن کمیشن کے خلاف ملک گیر احتجاج کا اعلان کرتے ہوئے پی ٹی آئی رہنما فواد چوہدری نے کہا کہ چیف الیکشن کمشنر نے جانبداری و بددیانتی کی انتہا کردی۔ منحرف اراکین کی اسمبلی نشست ختم کرنے کا ڈکلریشن بھی جاری نہیں کیا جارہا۔