گوگل نیوز پر ہمیں فالو کریںلاہور: پاکستان تحریک انصاف (پی ٹی آئی) نے ملک میں بڑھتی ہوئی مہنگائی کے خلاف جمعرات سے ملک گیر احتجاج شروع کرنے کا اعلان کردیا۔
پی ٹی آئی کے سینئر نائب صدر فواد چوہدری نے لاہور میں پارٹی چیئرمین عمران خان کی زیر صدارت پارٹی کے اعلیٰ سطحی اجلاس کے بعد صحافیوں سے گفتگو کرتے ہوئے کہا کہ ”کل سے ملک بھر میں بڑھتی مہنگائی، بگڑتی ہوئی معیشت اور گیس کی قلت کے خلاف احتجاج شروع ہو جائے گا۔“
فواد چوہدری کا کہنا تھا کہ پہلے مرحلے میں پی ٹی آئی کے اراکین قومی اور صوبائی اسمبلی ملک بھر میں اپنے حلقوں میں تین ہفتوں تک احتجاج کی قیادت کریں گے۔
پی ٹی آئی رہنما نے قوم سے پارٹی کا ساتھ دینے کی درخواست کرتے ہوئے کہا، ”تین ہفتوں کے بعد، عمران خان انتخابی مہم میں شامل ہوں گے اور یہ سلسلہ اس وقت تک جاری رہے گا جب تک اس حکومت کو نہیں نکالا جاتا۔”
مزید پڑھیں:اس وقت جو معاشی صورتحال ہے وہ تسلی بخش نہیں،سعید غنی
سڑکوں پر واپس آنے کا اعلان نومبر میں پی ٹی آئی کے سربراہ کی جانب سے راولپنڈی میں لانگ مارچ کو ختم کرنے اور پنجاب اور خیبرپختونخوا اسمبلیوں کو تحلیل کرنے کے منصوبے کے اعلان کے بعد سامنے آیا ہے، لیکن اس پر عمل ہونا ابھی باقی ہے۔
