بارش اور اربن فلڈنگ کے باعث تحریکِ انصاف کے کراچی جلسے کا مقام تبدیل

شہرِ قائد میں مسلسل بارش اور اربن فلڈنگ کے باعث پاکستان تحریکِ انصاف کے جلسے کا مقام تبدیل کردیا گیا ہے، سابق وزیر اعظم عمران خان کراچی میں عوام کے جمِ غفیر سے خطاب کریں گے۔

تفصیلات کے مطابق کراچی میں بارش کے باعث مزارِ قائد سے متصل باغِ جناح میں برسات کا پانی جمع ہوگیا۔ تحریکِ انصاف کا جلسہ باغِ جناح کی بجائے اب شاہراہِ قائدین میں ہوگا۔

یہ بھی پڑھیں:

عمران خان 19 اگست کو کراچی میں جلسہ عام سے خطاب کریں گے

دوسری جانب پی ٹی آئی نے حیدر آباد کا جلسہ منسوخ کردیا۔ واضح رہے کہ عمران خان نے 19 اگست کو کراچی کے باغِ جناح میں جلسۂ عام سے خطاب کا فیصلہ کیا تھا، جلسے کا نیا مقام شاہراہِ قائدین ہوگا۔

آج سے 3 روز قبل کراچی میں جلسے کا فیصلہ سابق وزیر اعظم اور چیئرمین پی ٹی آئی عمران خان کی زیرِ صدارت تحریکِ انصاف کے مشاورتی اجلاس میں کیا گیا۔

تحریکِ انصاف نے قبل از وقت انتخابات کیلئے موجودہ حکومت پرمزید دباؤ ڈالنے کا فیصلہ کرتے ہوئے کراچی اور حیدر آباد سمیت ملک کے متعدد شہروں میں عوامی جلسوں کی منظوری دے دی۔ 

تحریکِ انصاف کے رہنماؤں کے مابین سابق معاونِ خصوصی شہباز گِل کی گرفتاری پر سخت تشویش پائی جاتی ہے۔ پی ٹی آئی کارکنان کا کہنا ہے کہ شباز گِل کو تشدد کا نشانہ بنایا جارہا ہے۔