اسلام آباد میں پی ٹی آئی کا مظاہرہ، ریڈ زون میں کنٹینرز پہنچا دیے گئے

اسلام آباد: پاکستان تحریک انصاف (پی ٹی آئی) کی جانب سے آج الیکشن کمیشن کے خلاف احتجاج کے اعلان کے بعد ضلعی انتظامیہ نے ریڈ زون سیل کر کے داخلی راستوں پر کنٹینرز کھڑے کردیے۔

تفصیلات کے مطابق مظاہرین یا کسی بھی غیر متعلقہ شخص کو ریڈ زون میں داخلے کی اجازت نہیں جبکہ اینٹی رائٹس فورس، رینجرز، ایف سی اور پولیس ریڈ زون میں تعینات کی جائے گی ۔

ذرائع کا کہنا ہے کہ ریڈ زون میں داخلے کے لیے صرف مارگلہ روڈ کھلا رہے گا ۔

یہ بھی پڑھیں:

ہیلی کاپٹر حادثہ کے شہدا کی نماز جنازہ ادا، وزیراعظم، آرمی چیف کی شرکت

دوسری جانب تحریک انصاف کی احتجاج کی کال پر الیکشن کمشنر سندھ نے آئی جی سندھ کو ہنگامی مراسلہ ارسال کرتے ہوئے سکیورٹی طلب کرلی۔

خیال رہے کہ گزشتہ روز نجی ٹی وی چینل کو انٹرویو دیتے ہوئے پی ٹی آئی کے چیئر مین عمران خان کا کہنا تھا کہ الیکشن کمیشن ن لیگ اور پیپلز پارٹی کی فنڈنگ سامنے نہیں لا رہا، ہم الیکشن کمشنر کے خلاف سپریم جوڈیشل کمیشن میں جائیں گے، ہم الیکشن کمیشن کے سامنے پر امن احتجاج کریں گے، ریڈزون میں نہیں جائیں گے، الیکشن کمشنر نے ہمیں فارن فنڈڈ کہہ کر ہماری توہین کی ہے۔