وزیر اعظم شہباز نے گلگت بلتستان کے ضلع غذر میں 5 بیٹیوں، ایک بیٹا، بیوی اور ماں سمیت خاندان کے 8 افراد تباہ کن سیلاب میں کھو دینے والے مقامی شہری نو شیر خان اور ان کی واحد زندہ بچ جانے والی پندرہ سالہ بیٹی سحر سے ملاقات کی اور سانحہ پر افسوس کا اظہار کیا۔ اس موقع پر ہر شخص افسردہ نظر آیا۔

وزیر اعظم دونوں باپ بیٹی کو دیر تک تسلی دیتے رہے، وزیراعظم سے بات چیت کے دوران دونوں باپ بیٹی آبدیدہ ہوگئے، اس موقع پر وزیر اعظم کے چہرے پر بھی افسردگی کے تاثرات نمایاں رہے۔

یہ بھی پڑھیں:

افغانستان میں مسجد میں دھماکا، طالبان حامی معروف خطیب جاں بحق

نو شیر خان سیلاب کے روز گھر پر نہ ہونے کی وجہ سے بچ گئے تھے جبکہ ان کی 15 سالہ بیٹی نے بھاگ کر جان بچائی تھی۔

وزیراعظم محمد شہبازشریف کی گلگت بلتستان کے ضلع غذرمیں گاؤں بوبرمیں سیلاب متاثرین سے ملاقات۔سیلاب کی وجہ سے درپیش مسائل حل کرنے کی یقین دہانی۔
متاثرین کی آبادکاری میں بھرپورتعاون کرنے کےعزم کا اعادہ۔سیلاب متاثرین کی مکمل بحالی تک چین سے نہیں بیٹھیں گے۔وزیراعظم pic.twitter.com/kjZ25efCoa

— PML(N) (@pmln_org) September 2, 2022

ضلع غذر گاؤں بوبر میں سیلاب سے نو شیر خان کے گھر کے 8 افراد سمیت 12 شہری جاں بحق ہوئے تھے جبکہ اسماعیلی جماعت خانہ اور سو کے قریب گھر مکمل طور پر تباہ ہوئے تھے، سیلاب سے مال مویشی، فصلیں اور درخت بھی تباہ ہوئے تھے۔

وزیر اعظم نے غذر ضلع سے واپسی پر گلگت کے نواحی گاؤں گورو میں سیلاب سے  ہونے والے نقصانات کا فضائی جائزہ بھی لیا اور بعد ازاں وہ گلگت ایئر پورٹ پر پارٹی رہنماؤں سے سیلاب کی صورتحال پر بات چیت کرنے کے بعد واپس اسلام آباد روانہ ہوگئے۔

یاد رہے کہ گلگت بلتستان ڈیزاسٹر مینجمنٹ اتھارٹی کے مطابق گلگت بلتستان میں یکم جولائی سے جاری بارشوں اور سیلاب کے 110 واقعات میں 22 افراد ہلاک چھ زخمی 53 پل 500 آبپاشی چینلز اور آٹھ سو کے قریب گھروں کو نقصان پہنچا ہے۔