گوگل نیوز پر ہمیں فالو کریںاسلام آباد: صدر مملکت ڈاکٹر عارف علوی نے آفیشل سیکرٹ ایکٹ بل اور آرمی ایکٹ ترمیمی بل کے معاملے پر اپنے سیکریٹری وقار احمد کی خدمات اسٹیبلشمنٹ ڈویژن کو واپس کردیں۔
نگراں وزیراعظم کے پرنسپل سیکریٹری کے نام ایوانِ صدر کی جانب سے خط میں لکھا گیا ہے کہ کل کے واضح بیان کے پیش نظر ایوان صدر نے صدر مملکت کے سیکریٹری کی خدمات اسٹیبلشمنٹ ڈویژن کو واپس کردی ہیں، صدر مملکت ڈاکٹر عارف علوی کے سیکریٹری وقار احمد کی اب مزید ضرورت نہیں رہی، ان کی خدمات اسٹیبلشمنٹ ڈویژن کو واپس کی جاتی ہیں۔
ایوانِ صدر کی جانب سے جاری کردہ خط میں مزید کہا گیا ہے کہ پاکستان ایڈمنسٹریٹو سروس کی 22 گریڈ کی افسر حمیرا احمد کو بطورصدر مملکت کی سیکریٹری تعینات کیا جائے۔
ذرائع کا کہنا ہے کہ نگراں وزیراعظم انوارالحق کاکڑ اس وقت جڑنوالہ میں موجود ہیں، ان کی واپسی پر انہیں خط سے آگاہ کیا جائے گا اور اس حوالے سے کوئی فیصلہ کیا جائے گا۔ صدر مملکت کا خط وزیراعظم آفس کو موصول ہونے کے بعد رائے سامنے آئے گی۔
مزید پڑھیں:سائفر کیس میں شاہ محمود قریشی کا جسمانی ریمانڈ منظور، 25 اگست کو دوبارہ پیش کرنیکا حکم
صدر مملکت ڈاکٹر عارف علوی کے سیکرٹری وقار احمد کی گزشتہ سال گریڈ 22 میں ترقی ہوئی تھی۔ وہ اس سے قبل ایوان صدر میں ہی بطور ایڈیشنل سیکرٹری خدمات سرانجام دے رہے تھے اور صدر مملکت کی خواہش پر ہی انہیں ایوان صدر میں سیکرٹری تعینات کیا گیا تھا۔
