سندھ میں گورنر راج کیلئے سمری کی تیاری شروع، آصف زرداری نے توڑ نکال لیا

اسلام آباد :سندھ میں گورنر راج کے حوالے سے وفاقی وزارت داخلہ میں سمری کی تیاری شروع کی اطلاعات کے بعد پیپلز پارٹی کی کور کمیٹی کااجلاس بھی طلب کرلیا گیا۔

نجی ٹی وی کے مطابق وزیراعظم عمران خان سے وزیر داخلہ شیخ رشید آج اہم ملاقات کریں گے جس کے بعد شیخ رشید کی صدارت میں وزارت داخلہ میں اجلاس ہوگا۔

ذرائع کا کہنا ہے کہ اجلاس میں سندھ میں امن وامان کی صورتحال کا جائزہ لیا جائے گا، سندھ میں امن و امان کی خراب صورتحال کے تناظر میں سمری تیار کی جائے گی۔ذرائع کے مطابق وزارت داخلہ سندھ میں گورنر راج کی سمری وزیر اعظم کو بھجوا سکتی ہے۔

مزید پڑھیں:عمران خان کے 28 ساتھیوں کی وفاداریاں تبدیل، عدم اعتماد سے پہلے حکومتی پتے بکھر گئے

وفاقی وزیر داخلہ شیخ رشید کی جانب سے سندھ میں گورنر راج لگانے سے متعلق بیان سامنے آنے کے بعد پاکستان پیپلز پارٹی نے کور کمیٹی کا ہنگامی اجلاس ہوا۔

اسلام آباد زرداری ہاؤس میں اجلاس کی صدارت پاکستان پیپلز پارٹی کے شریک چیئرمین آصف علی زرداری اور چیئرمین بلاول بھٹو زرداری نے کی۔

اجلاس میں وفاقی وزیر داخلہ شیخ رشید کے بیان پر مشاورت کی گئی اور ملکی سیاسی صورت حال پر تبادلہ خیال بھی کیا گیا اور صورتحال سے نمٹنے کیلئے حکمت عملی تیار کرلی گئی ہے۔