کورونا کو شکست ہوگی، زندگی اپنی رنگینیوں کی طرف لوٹ آئے گی، ڈاکٹر ہماء میر

کراچی:  معروف اداکارہ ڈاکٹر ہماء میر نے کہا ہے کہ کورونا کو شکست دینے کیلئے احتیاطی تدابیر اختیار کرنے کی ضرورت ہے۔

اپنے ایک ویڈیو پیغام میں مداحوں سے بات کرتے ہوئے ڈاکٹر ہماء میر نے کہا کہ اس وقت پوری دنیا کورونا وائرس کی وجہ سے پریشان ہے۔

ان کا کہنا ہے کہ موذی مرض کو احتیاطی تدابیر سے ہی ہرایا جاسکتا ہے، اگر ہم حفظان صحت کے اصولوں کی پیروی کریں تو باآسانی کورونا وائرس کو شکست دے سکتے ہیں۔

ڈاکٹر ہما ء میر نے مداحوں کو حوصلہ قائم رکھنے کا مشورہ دیتے ہوئے اس امید کا اظہار کیا ہے کہ جلد کورونا کی وباء پر قابو پالیا جائے گا اور زندگی ایک بار پھر اپنی تمام تر رنگینیوں کی طرف لوٹ آئے گی، کورونا سے ڈرنا نہیں بلکہ ملکر لڑنا ہے۔

مزید پڑھیں: پاکستان میں کورونا وائرس کے 65 نئے کیسز رپورٹ، تعداد 2040 ہو گئی

واضح رہے کہ ناول کورونا وائرس کی وجہ سے اس وقت پوری دنیا میں معمولات زندگی درہم برہم ہوچکے ہیں اور دو سو سے زائد ممالک میں لاک ڈائون کی وجہ سے لوگ گھروں میں محصور ہیں۔

پاکستان میں  کورونا وائرس کے کیسز کی تعداد 2040 تک پہنچ گئی ہے جبکہ اب تک ملک کے مختلف علاقوں میں 26 افراد کورونا وائرس کی وجہ سے اپنی جان گنوا چکے ہیں۔

جبکہ فنکاروں کی جانب سے  مشکل وقت میں عوام کی امداد فراہم کی جارہی ہے اور فنکاروں کی طرف سے مداحوں کو احتیاطی تدابیر کے حوالے سے پیغامات کا سلسلہ بھی جاری ہے۔