بلدیاتی انتخابات، بلوچستان کے 32 اضلاع میں پولنگ کا آغاز

کوئٹہ: صوبہ بلوچستان کے 32 اضلاع میں آج صبح سے پولنگ کا آغاز کردیا گیا ہے۔ 17 ہزار 774 امیدوار الیکشن کیلئے  میدان میں ہیں۔ عوام کی بڑی تعداد حقِ رائے دہی استعمال کرنے کیلئے گھروں سے نکل آئی۔ 

تفصیلات کے مطابق بلوچستان میں آج صبح 8 بجے سے پولنگ کا آغاز ہوا۔ پولنگ کا عمل بلا تعطل شام 5 بجے تک جاری رہے گا۔ صوبے کے 32 اضلاع میں بلدیاتی انتخابات کیلئے 5 ہزار 624 پولنگ اسٹیشنز قائم کیے گئے ہیں۔

یہ بھی پڑھیں:

وزیراعلیٰ کے خلاف تحریک عدم اعتماد تکنیکی بنیادوں پر مسترد

الیکشن کمیشن آف پاکستان کے مطابق 32 اضلاع میں رجسٹرڈ ووٹرز میں شامل مردوں کی تعداد 2 لاکھ 43 ہزار 828 جبکہ خواتین کی 1 لاکھ 57 ہزار 896 ہے۔ 5 ہزار 624 پولنگ اسٹیشنز میں الیکشن کیلئے 13 ہزار 533 بوتھ قائم ہیں۔

حساس پولنگ اسٹیشنز پر سکیورٹی کے خاص انتظامات کیے گئے ہیں۔ بلوچستان کی 7 میونسپل کارپوریشنز اور 838 یونین کونسلز کے لیے ووٹنگ کا عمل جاری ہے۔ 1584 وارڈز میں امیدوار پہلے ہی بلا مقابلہ کامیاب قرار دے دئیے گئے۔

خیال رہے کہ اس سے قبل وزیراعلیٰ بلوچستان عبدالقدوس بزنجو کے خلاف تحریک عدم اعتماد کو تکنیکی بنیادوں پر خارج کردیا گیا جبکہ تحریک پیش کرنے والے اراکین مطلوبہ تعداد میں وزیر اعلیٰ کے خلاف ووٹ پیش کرنے میں ناکام رہے۔

تحریک عدم اعتماد کی حمایت میں کم از کم 13 اراکینِ اسمبلی کے ووٹ آنا ضروری تھا لیکن صرف 11 ارکان نے موجودہ وزیراعلیٰ کو ہٹانے کی قرارداد کی حمایت کی۔تحریک عدم اعتماد مطلوبہ حمایت نہ ملنے پر از خود غیر مؤثر ہوگئی۔