ملک بھر میں انسدادِ پولیو مہم آج سے شروع، ڈھائی کروڑ بچوں کو قطرے پلائے جائینگے

اسلام آباد: ملک بھر میں آج سے انسدادِ پولیو مہم شروع ہورہی ہے جس کے دوران ڈھائی کروڑ سے زائد بچوں کو پولیو کے قطرے پلائے جائیں گے۔

تفصیلات کے مطابق آج شروع ہونے والی انسدادِ پولیو مہم میں ملک کے 83 مخصوص اضلاع میں بچوں کو پولیو سے حفاظت کیلئے قطرے پلائے جائیں گے۔ آج سے شروع ہونے والی مہم آئندہ 5روز تک جاری رہے گی۔

یہ بھی پڑھیں:

پولیو فری پاکستان ہمارا قومی مقصد ہے، وزیراعظم

خیال رہے کہ اس سے قبل وزیراعظم شہباز شریف نے کہا ہے کہ پولیوفری پاکستان ہمارا قومی مقصد ہے جبکہ پاکستان ان چند ممالک میں سے ایک ہے جہاں اب بھی پولیو کے کیسز موجود ہیں جو بدقسمتی ہے۔ 

 سماجی رابطے کی ویب سائٹ ٹوئٹر پر اگست کے دوران اپنے پیغام میں وزیراعظم شہباز شریف نے کہا کہ وفاقی اور صوبائی حکومتوں کو ایک اجتماعی مشن کے طور پر پولیو وائرس کے خاتمے کے لیے پوری کوشش کرنی چاہیے۔ والدین سے اپیل ہے پولیو ٹیموں کے ساتھ تعاون کریں۔

ٹوئٹر پیغام میں وزیر اعظم شہباز شریف نے کہا کہ اچانک سیلاب کی وجہ سے ملک کے کئی علاقوں تک رسائی تقریباً منقطع ہونے کی وجہ سے انسداد پولیو مہم مزید چیلنجنگ بن گئی ہے۔