مسلم لیگ (ن) کا وفد اہم سیاسی معاملات پر پارٹی قیادت سے مشاورت کیلئے لندن روانہ

اسلام آباد:مسلم لیگ (ن) کے اراکین کا ایک پارلیمانی گروپ اپنی جماعت کے تاحیات قائد نواز شریف سے ملنے اور پارٹی کے صدر شہباز شریف سے اہم معاملات پر مشاورت کے لیے لندن روانہ ہوگئے۔

مسلم لیگ (ن) کی ترجمان مریم اورنگزیب نے اس بات کی تصدیق کرتے ہوئے بتایا کہ مسلم لیگ (ن) کا وفد پارلیمانی معاملات پر قیادت کی رہنمائی حاصل کرے گا۔

دریں اثنا پارٹی کے ذرائع کے مطابق شہباز شریف کی سربراہی میں مسلم لیگ (ن) کی سینئر قیادت کا اجلاس جمعہ کو ہوگا۔خیال رہے کہ مسلم لیگ(ن) کے قائد نواز شریف خرابی صحت کے باعث علاج کے سلسلے میں لندن میں موجود ہیں جبکہ شہباز شریف ان کے ہمراہ وہاں ہیں۔

اس حوالے سے مسلم لیگ (ن) کے خیبرپختونخوا کے صدر امیر مقام کے ترجمان کا کہنا تھا کہ وہ صبح کے اوقات میں اسلام آباد سے لندن کے لیے روانہ ہوئے تاہم انہوں نے مزید بتایا کہ امیر مقام مسلم لیگ (ن) کے وفد سے علیحدہ اپنی طرف سے گئے ہیں۔

علاوہ ازیں مسلم لیگ (ن) کے ورکرز نے تصدیق کی کہ پارٹی کے لیے پارلیمانی مشاورت گروپ لندن روانہ ہوا اور اس گروپ میں مریم اورنگزیب، رکن قومی اسمبلی خواجہ آصف، رانا تنویر، سردار ایاز صادق اور سینیٹر پرویز رشید شامل تھے جبکہ پارٹی کے جنرل سیکریٹری احسن اقبال کی کل روانگی کا امکان ہے۔

مزید پڑھیں: نواز شریف اور ان کی ٹیم کی بے گناہی ایک ایک کر کے سامنے آرہی ہے،شہباز شریف

ذرائع نے بتایا کہ گروپ، پارٹی قیادت سے آرمی چیف کی مدت ملازمت میں توسیع سے متعلق قانون سازی، الیکشن کمیشن آف پاکستان کے اراکین کا تقرر اور ملکی سیاسی صورتحال پر تبادلہ خیال کرے گا۔

مذکورہ ذرائع نے بتایا کہ آرمی چیف کی مدت ملازمت میں توسیع سے متعلق قانون سازی پر ان کی جماعت کی پوزیشن کا حتمی فیصلہ نواز شریف کریں گے۔واضح رہے کہ ای سی پی اراکین کے تقرر کے معاملے پر حکومت اور اپوزیشن ڈیڈ لاک کا شکار ہیں اور دونوں فریقن کسی معاملے پر متفق نہیں ہوسکے۔

اگرچہ وزیراعظم عمران خان اور اپوزیشن لیڈر شہباز شریف کی جانب سے ان عہدوں کے لیے اپنی تجاویز متعلقہ پارلیمانی کمیٹی کو بھیجی گئی تھی، تاہم ابھی تک اس پر کوئی حتمی فیصلہ نہیں ہوسکا۔

اس معاملے پر گزشتہ روز اپوزیشن کے اراکین نے سپریم کورٹ سے رجوع کرلیا تھا ور درخواست کی تھی کہ وہ چیف الیکشن کمشنر (سی ای سی) اور دو ای سی پی اراکین کے تقرر کے معاملے پر پارلیمنٹ کے درمیان پیدا ہونے والے تعطل کی روشنی میں ایک مناسب حکم جاری کرے۔