پاک ترکی سفارتی تعلقات کی 75ویں سالگرہ، وزیر اعظم ترکی کا دورہ آج کرینگے

اسلام آباد: پاکستان اور ترکی اپنے باہمی سفارتی تعلقات کی 75ویں سالگرہ منا رہے ہیں، وزیر اعظم شہباز شریف ترکی کے دورے کیلئے آج روانہ ہوں گے۔ عہدہ سنبھالنے کے بعد وزیر اعظم کا یہ ترکی کا پہلا دورہ ہوگا۔

تفصیلات کے مطابق دفترِخارجہ نے وزیر اعظم کے دورۂ ترکی کے متعلق بیان جاری کرتے ہوئے کہا کہ ترک صدر رجب طیب اردگان وہ پہلے عالمی رہنما تھے جنہوں نے عہدہ سنبھالنے پر وزیر اعظم شہباز شریف کو مبارکباد دی۔ عید الفطر کے موقعے پر بھی دونوں سربراہانِ مملکت نے ٹیلیفون پر گفتگو کی تھی۔

یہ بھی پڑھیں:

آصف زرداری کے بہنوئی کے پروٹوکول کی گاڑی  کو لوٹ لیا گیا 

ترجمان دفترِ خارجہ عاصم افتخار کا کہنا ہے کہ ترکی کے دورے کے موقعے پر وزیر اعظم کے ہمراہ وزراء، معاونینِ خصوصی اور اعلیٰ سطحی وفد بھی ہوگا۔ پاکستان کی مختلف کمپنیوں کے نمائندگان پر مشتمل وفد بھی ترکی کے دورے کیلئے ہمراہ ہوگا۔ وزیر اعظم اور ترک صدر رجب طیب اردگان کی ملاقات بھی ہوگی۔

دفترِ خارجہ ترجمان کے بیان کے مطابق دونوں رہنماؤں کی ملاقات کے بعد وفود کی سطح پر بات چیت بھی ہوگی۔پاک ترکی تعلقات کے علاوہ علاقائی اور بین الاقوامی امور پر بھی تبادلۂ خیال کیا جائے گا۔ ملاقات کے بعد وزیر اعظم شہباز شریف اور ترک صدر رجب طیب اردگان مشترکہ پریس کانفرنس سے خطاب بھی کریں گے۔

بیان کے مطابق ترک صدر وزیر اعظم شہباز شریف کے اعزاز میں عشائیہ دینگے۔ رواں برس پاکستان اور ترکی کے سفارتی تعلقات کو 75برس مکمل ہوئے ہیں۔ دونوں سربراہانِ مملکت مشترکہ طور پر سفارتی تعلقات سے متعلق لوگو کی تقریبِ رونمائی میں شریک ہوں گے۔ ترک وزیرِ خارجہ و صحت بھی وزیر اعظم سے ملاقات کرینگے۔