گوگل نیوز پر ہمیں فالو کریںاسلام آباد: وزیر اعظم شہباز شریف نے عالمی بینک کی جانب سے پاکستان میں 40 ارب ڈالر کی سرمایہ کاری کے اعلان کا خیر مقدم کرتے ہوئے اسے ملکی معیشت کے مختلف شعبوں میں ایک نئے دور کا آغاز قرار دیا۔
وزیر اعظم نے یہ بات اسلام آباد میں عالمی بینک کے ایگزیکٹو ڈائریکٹرز کے وفد سے ملاقات کے دوران کہی۔
انہوں نے کہا کہ پاکستان اور عالمی بینک کے درمیان 70 سال سے زائد عرصے پر محیط شراکت داری رہی ہے جس سے پاکستان کو بے پناہ فوائد حاصل ہوئے ہیں۔ وزیراعظم نے 2022 کے سیلاب سے متاثرہ عوام کی مدد پر عالمی بینک کا شکریہ ادا کیا۔
انہوں نے وضاحت کی کہ 40 ارب ڈالر کی سرمایہ کاری عالمی بینک کے حالیہ کنٹری پارٹنرشپ فریم ورک کا حصہ ہے، جسے انہوں نے “انتہائی حوصلہ افزا” قرار دیا۔
وزیر اعظم کے مطابق 20 ارب ڈالر صحت، تعلیم، نوجوانوں کی ترقی اور دیگر سماجی شعبوں کے مختلف منصوبوں کے لیے مختص کیے گئے ہیں جبکہ باقی 20 ارب ڈالر کی سرمایہ کاری انٹرنیشنل فنانس کارپوریشن (آئی ایف سی) کے ذریعے نجی شعبے میں کی جائے گی جس سے ملک کی اقتصادی ترقی میں تیزی آئے گی۔
انہوں نے کہا کہ حکومت کے اقتصادی اصلاحاتی پروگرام میں تیزی سے پیش رفت ہو رہی ہے اور عالمی بینک کا پاکستان پر اعتماد خوش آئند ہے۔ وزیر اعظم نے اس عزم کا اظہار کیا کہ ملک کی معیشت درست سمت میں گامزن ہے اور ترقی کی جانب بڑھ رہی ہے تاہم پائیدار اقتصادی ترقی کے لیے مزید کوششوں کی ضرورت ہے۔
وزیر اعظم نے معیشت کی بہتری کا سہرا حکومتی معاشی ٹیم کی محنت کو دیا اور کہا کہ ملکی برآمدات اور ترسیلات زر میں اضافہ ہو رہا ہے جبکہ شرح سود میں کمی کی وجہ سے پیداواری شعبے میں سرمایہ کاری بڑھ رہی ہے۔
انہوں نے مزید کہا کہ حکومت بدعنوانی پر قابو پانے کے لیے نظام میں شفافیت متعارف کروا رہی ہے، اور فیڈرل بورڈ آف ریونیو (ایف بی آر) میں اصلاحات کے تحت ڈیجیٹائزیشن کو اولین ترجیح دی جا رہی ہے۔
وزیر اعظم نے توانائی کے شعبے میں اصلاحات پر زور دیا تاکہ بجلی کی بلا تعطل فراہمی یقینی بنائی جا سکے اور نقصانات میں کمی لائی جا سکے۔
انہوں نے کہا کہ خصوصی سرمایہ کاری سہولت کونسل نے پاکستان میں سرمایہ کاری کے لیے ایک پرکشش ماحول پیدا کیا ہے، جو تمام متعلقہ فریقین کے اشتراک سے کام کر رہی ہے۔
وزیر اعظم نے اس بات پر زور دیا کہ حکومت قرضوں پر انحصار کرنے کے بجائے سرمایہ کاری اور شراکت داری کو ترجیح دے رہی ہے۔
عالمی بینک کے وفد نے پاکستان کے جاری اصلاحاتی پروگرام اور اس کی مؤثر عمل درآمد کی تعریف کی۔ وفد کے ارکان نے کہا کہ وزیر اعظم شہباز شریف کی قیادت میں پاکستان کے اقتصادی اصلاحات کا سفر تیزی سے آگے بڑھ رہا ہے۔
انہوں نے توانائی، صنعت، برآمدات، نجکاری، محصولات میں اضافے اور دیگر اہم شعبوں میں حکومتی اصلاحات کو سراہا۔
عالمی بینک کے نو رکنی ایگزیکٹو ڈائریکٹرز کا وفد اس وقت پاکستان کے دورے پر ہے، جو مختلف ممالک کے منصوبوں کی نگرانی کر رہا ہے۔ وفد پاکستان میں اقتصادی ترقی کے منصوبوں اور سرمایہ کاری کے مواقع پر تبادلہ خیال کرے گا۔
اس ملاقات میں وفاقی وزراء احسن اقبال، احد خان چیمہ، سردار اویس خان لغاری، ڈاکٹر مصدق ملک، وزرائے مملکت علی پرویز ملک اور شزہ فاطمہ خواجہ، وزیر اعظم کی کوآرڈینیٹر رومینہ خورشید عالم، سینیٹر شیری رحمان، رکن قومی اسمبلی نفیسہ شاہ، وزیر اعظم کی نمائندہ برائے پولیو پروگرام عائشہ رضا فاروق اور دیگر اعلیٰ حکام شریک تھے۔
