ہمیشہ عوامی فلاح و بہبود کو ترجیح دی، عدالت میں پیشی میرا فرض ہے۔وزیر اعظم

لاہور:  وزیر اعظم پاکستان شہباز شریف نے کہا ہے کہ میں نے ہمیشہ عوامی فلاح و بہبود کو ترجیح دی ہے جبکہ عدالت میں پیشی میرا فرض اور ذمہ داری ہے۔

تفصیلات کے مطابق احتساب عدالت لاہور میں آج رمضان شوگر ملز کیس کی سماعت ہوئی۔ وزیر اعظم شہباز شریف اور حمزہ شہباز کو طلب کیا گیا تھا، تاہم وزیر اعلیٰ پنجاب پیش نہ ہوسکے۔

یہ بھی پڑھیں:

کراچی کے شہری تیار رہیں، 22 جون سے بارشوں کا امکان

وزیر اعظم نے احتساب عدالت میں مستقل حاضری سے استثنیٰ کی درخواست دائر کردی۔ وزیر اعلیٰ پنجاب حمزہ شہباز کی جانب سے بجٹ سیشن میں مصروفیت کے باعث حاضری سے استثنیٰ کی درخواست دائر کی گئی۔

عدالت میں پیشی کے دوران وزیر اعظم شہباز شریف نے کہا کہ جنیوٹ میں نالہ مقامی رکنِ صوبائی اسمبلی کی درخواست پر تعمیر کیا گیا، جس کیلئے پنجاب کی صوبائی کابینہ سے باضابطہ منظوری حاصل کی گئی۔

پیشی کے دوران وزیر اعظم نے کہا کہ بطور وزیر اعلیٰ میں نے عوامی فلاح و بہبود مقدم رکھی۔ گنے کی قیمت مقرر کرنے میں ملز کی جگہ کاشتکار کے مفادات پیشِ نظر رکھے گئے۔

وزیر اعظم نے کہا کہ عدالت نے جب جب طلب کیا، اپنی پیشی یقینی بنائی، کیونکہ یہ میرا فرض اور ذمہ داری ہے۔ وزارتِ عظمیٰ اور قومی ذمہ داریوں کے باعث حاضری سے استثنیٰ کی استدعا کی ہے۔

احتساب عدالت نے وزیر اعظم سمیت دیگر ملزمان کی حاضری کی تکمیل کے بعد وزیر اعظم کو حاضری سے استثنیٰ دے دیا۔ وکیل امجد پرویز کا کہنا تھا کہ شہباز شریف عدالتی اجازت کا غلط استعمال نہیں کرتے۔