وزیراعظم عمران خان کو سارے چور ڈاکو ن لیگ میں نظر آتے ہیں، خواجہ آصف

اسلام آباد: پاکستان مسلم لیگ ن کے رہنماء خواجہ آصف نے کہا ہے کہ کیا وزیراعظم عمران خان کو سارے چور ڈاکو ن لیگ میں نظر آتے ہیں، کیا حکومتی صفوں میں سب صاف ستھرے لوگ ہیں۔

مسلم لیگ ن کے رہنما خواجہ آصف نے قومی اسمبلی میں اظہار خیال کرتے ہوئے کہا کہ نواز اور شہباز شریف کی ملیں بند ہیں تو کون چینی مہنگی بیچ رہا ہے۔ کون حکومت کی چھتری کے نیچے لوٹ مار مچا رہا ہے۔

خواجہ محمد آصف نے کہا کہ ملک میں لوگ آٹے کیلئے ترس رہے ہیں، مہنگائی بہت بڑھ گئی ہے، 45 فیصد شوگر ملیں پی ٹی آئی ارکان کی ہیں، مہنگائی سے متعلق ارکان اسمبلی کی ایک کمیٹی بنائی جائے۔

انہوں نے کہاکہ کمیٹی ملک کو لوٹنے والوں کا تعین کرے، قوم کے ساتھ ملکی تاریخ میں بڑی زیادتی ہوئی، لوگوں کو چور کہنا اور اپنی بغل میں چور لے کر بیٹھے رہنا۔

مزید پڑھیں: چوہدری شجاعت حسین کاعمران خان اتحادیوں پر اعتماد اور فسادیوں سے دور رہنے کا مشورہ

ن لیگ کے رہنماء خواجہ آصف کا کہنا تھا حکومتی صفوں میں موجود ڈاکو اور چور حکومت کو لے بیٹھیں گے، ان ڈاکوؤں اور چوروں کا پیٹ بھرتاہی نہیں ہے ۔

مہنگائی عوام کا بنیادی مسئلہ ہے، ا سپیکر قومی اسمبلی ایوان میں مہنگائی پر بحث کرائیں، عوام کے حقوق کا تحفظ ہمارا بنیادی حق ہے۔

انہوں نے کہا کہ تمام ممالک نے چین سے اپنے شہریوں کو نکال لیا، پاکستانی طلبا کو نکالنا ہماری حکومت کی ذمہ داری ہے، انہوں نے کہا کہ چین میں پاکستانی طلبا کا خیال رکھا جا رہا ہے لیکن انہیں واپس لایا جائے، کورونا وائرس کے شکار پاکستانی طلبا کے علاوہ دیگر کو واپس لایا جائے۔