وزیراعظم کل پودے لگانے کے عالمی ریکارڈ کی تقریب میں شریک ہونگے

گوجرانوالہ :وزیراعظم عمران خان گوجرانوالہ میں پودے لگانے کے عالمی ریکارڈ کی تقریب میں شریک ہوں گے۔

ضلعی انتظامیہ کے مطابق پودے 12 اگست کی شام 3بجے لگائے جائیں گے۔پودے لگانے کے مقابلے میں سرکاری اسکولوں کے طالب علم حصہ لیں گے۔

شام کے وقت طلبہ کی حاضری یقینی بنانے کیلئے اسکولوں کے اوقات بھی تبدیل کرنے کا نوٹی فکیشن جاری کردیا گیا ہے۔

نوٹی فکیشن کے مطابق گرلز اسکول دوپہر 12سے شام 5بجے تک کھلیں گے، بوائز اسکولوں کے اوقات سوا 12سے شام سوا 5 بجے ہوں گے۔

نوٹیفکیشن کا اطلاق ہوگیا،سی ای او ایجوکیشن کا کہنا ہے کہ12 اگست کے ایونٹ میں طلباء کی حاضری یقینی بنانے کیلیے فیصلہ کیا گیا ، 2 دن پہلے اوقات تبدیل کیے تاکہ بچوں کو شام کو اسکول آنے کی عادت ہو جائے۔

دوسری جانب وزیر مملکت اطلاعات و نشریات فرخ حبیب نے کہا ہے کہ لاہور ، بلوچستان اور بہاولپور میں ڈرون شجر کاری ہوگی ،وزیراعظم عمران خان موسمیاتی تبدیلی پر کام کرنے کے حوالے سے عالمی لیڈر بن کر ابھرے ہیں،پائیدار امن کے لیے مل بیٹھنے اور سیاسی حل تلاش کرنے کی ضرورت ہے۔

اپنے بیان میں انہوں نے کہاکہ ایک طرف اقوام متحدہ کے سیکرٹری جنرل نے آئی پی سی سی رپورٹ پر آئندہ 10 سال میں درجہ حرارت شدید بڑھنے کی ریڈ وارننگ جاری کردی ہے۔ انہوں نے کہاکہ وزیراعظم عمران خان شجر کاری مہم کی خود قیادت کررہے ہیں، لاہوراربن میوا کی اور بلوچستان لسبیلہ(میانی) مینگروز اور لال سوہانرابہاولپور میں ڈرون شجرکاری ہوگی۔

مزید پڑھیں:بلوچستان کی ترقی کے لئے ایک ہزار ارب روپے خرچ کررہے ہیں، وزیر اعظم

وزیر مملکت نے کہا کہ وزیراعظم عمران خان موسمیاتی تبدیلی پر کام کرنے کے حوالے سے عالمی لیڈر بن کر ابھرے ہیں۔ انہوں نے کہاکہ عالمی ادارے بھی وزراعظم عمران خان کی ان کاوشوں کے معترف ہیں،بلین ٹری منصوبہ کو اقوام متحدہ ، ورلڈ اکنامک فورم، بون چیلنج میں پذیرائی حاصل ہوئی۔

فرخ حبیب نے کہاکہ پائیدار امن کے لیے مل بیٹھنے اور سیاسی حل تلاش کرنے کی ضرورت ہے۔ فرخ حبیب نے کہاکہ پائیدار امن کا حل تلاش کرنے کی بجائے افغان حکام مسلسل پاکستان کے خلاف پروپیگنڈے میں مصروف ہیں۔ انہوں نے کہاکہ یہ غفلت ہے یا جان بوجھ کر افغان عوام کے فرائض سے روگردانی ہے۔

وزیر مملکت نے کہاکہ مینگرووز ساحل کے قدرتی نگہبان ہیں جو سائیکلون اور سمندر کی سطح میں اضافے سے حفاظت سمیت متعدد فوائد فراہم کرتے ہیں،مینگروز میں بہترین کاربن سنک بھی ہیں جو عام جنگلات کے کاربن کو 4 گنا ذخیرہ کرتے ہیں۔

انہوں نے کہاکہ پاکستان دنیا کا واحد ملک ہے جس میں مینگروز کی پیدوار کی شرح سب سے زیادہ ہے ، پچھلے 10 سالوں میں مینگرووز کی پیدوار میں 300 فیصد اضافہ ہوا ہے، بلوچستان مینگروو میں بھی تیزی سے اضافہ ہورہا ہے اور اب 12000 ایکڑ اضافی مینگرووز اگائے جارہے ہیں ۔

انہوں نے کہا کہ ان مینگرووز میں ذخیرہ کیا گیا بلیو کاربن بھی کافی ہے اور اس کی قیمت 2.5 بلین روپے ہے جسے بلیو بانڈ کے ذریعے سرمایہ بنایا جا سکتا ہے، پاکستان اس پر کام کر رہا ہے، مینگرووز کا تحفظ اور توسیع مقامی برادریوں اور مقامی لوگوں کو گرین روزگار فراہم کر رہی ہے جو ان ساحلی علاقوں میں رہتے ہیں۔ انہوں نے کہاکہ مقامی لوگوں کا عالمی دن بھی ہے، وزیراعظم کی میانی میں موجودگی ان کوششوں کا اعتراف ہے۔