وزیر اعظم شہباز شریف نے سی پیک اتھارٹی تحلیل کرنیکی منظوری دیدی

اسلام آباد:وزیر اعظم شہباز شریف نے پاک چین اقتصادی راہداری منصوبے پر بنائی گئی سی پیک اتھارٹی تحلیل کرنے کی منظوری دے دی ہے جس کیلئے چین سے رضامندی حاصل کی جائے گی۔

تفصیلات کے مطابق وزیر اعظم نے سی پیک اتھارٹی کو ختم کرنے کی منظوری گزشتہ روز دی جسے چین کی رضامندی سے مشروط کیا گیا تھا۔ حکام کا کہنا ہے کہ فیصلے سے اربوں ڈالر کا منصوبہ تیزی سے پایۂ تکمیل کو پہنچ سکے گا۔

یہ بھی پڑھیں:

انٹربینک میں ڈالر مزید مہنگا، 216 روپے کا ہوگیا

آج سے 2 ماہ قبل وزارتِ منصوبہ بندی کی جانب سے سی پیک اتھارٹی تحلیل کرنے کیلئے سمری ارسال کی گئی۔ حکام کا کہنا ہے کہ اتھارٹی اپنے قیام کے وقت سے ہی متنازعہ فیصلے کر رہی ہے۔

وزیرِ منصوبہ بندی احسن اقبال کا کہنا ہے کہ سی پیک اتھارٹی کی تحلیل پاک چین اقتصادی راہداری منصوبے کے اپنے مفاد میں ہے جس کا مقصد سی پیک منصوبوں پر تیزی سے عملدرآمد یقینی بنانا ہے۔ وزیر اعظم نے چین کو اعتماد میں لینے کی ہدایت کی۔

احسن اقبال نے کہا کہ پاک چین اقتصادی راہداری منصوبے پر قائم کی گئی اتھارٹی تحلیل کرنے سے یہ مراد نہ لیا جائے کہ پاکستان کی جانب سے سی پیک کو ختم کیا جارہا ہے۔ اتھارٹی ایکٹ چینی حکام کی رضامندی کے بعد منسوخ ہوگا۔

وفاقی وزیر احسن اقبال نے کہا کہ چین نے اب تک سی پیک کے نفاذ کے متعلق پاکستان کی اندرونی فیصلہ سازی کو متاثر نہیں کیا، اتھارٹی کی تحلیل کا فیصلہ مسلم لیگ (ن) کی پالیسی کے تحت بھی درست ہے۔ ہم کسی متوازی سیٹ اپ کے حق میں نہیں۔