بارش سے تباہی، وزیر اعظم کا جاں بحق افراد کے لواحقین کیلئے امداد کا اعلان

اسلام آباد: وزیر اعظم میاں شہباز شریف نے ملک بھر میں بارشوں سے ہونے والی تباہی کے بعد جاں بحق افراد کے لواحقین کیلئے مالی امداد کا اعلان کیا ہے جس میں وفاق اور صوبے اپنا اپنا کردار ادا کریں گے۔

تفصیلات کے مطابق ملک بھر میں بالخصوص کوئٹہ سمیت بلوچستان کے مختلف شہروں اور کراچی سمیت سندھ کے متعدد شہروں میں بارشوں نے تباہی مچا دی۔ بلوچستان میں بارشوں اورسیلابی ریلوں کے باعث 45افراد جاں بحق ہوگئے ہیں۔

یہ بھی پڑھیں:

محکمہ موسمیات  کی عیدالاضحیٰ پر بارشوں کی پیشگوئی

طوفانی بارشوں کے باعث بلوچستان کے کم از کم 250گھروں کو نقصان پہنچا۔ پشین کے کئی علاقوں میں سیلابی ریلہ داخل ہوگیا۔ لیویز کی گاڑی بھی سیلابی ریلے میں بہہ گئی۔ خضدار کے دریا میں درمیانے درجے کا سیلاب آگیا۔ کوئٹہ شاہراہ کے 2 بڑے پلوں کو نقصان پہنچا۔

کوہلو کے علاقے تمبو سے گزشتہ 7 روز سے بجلی غائب ہے۔ ملک بھر میں بارشوں سے بڑے پیمانے پر انفراسٹرکچر تباہ ہوگیا۔ مختلف حادثات کے دوران مزید 23افراد جاں بحق ہو گئے ہیں۔ ٹھٹھہ میں کوئلے کی کان میں پانی بھرنے سے 8افراد جاں بحق ہوگئے تھے۔

ملتان میں چھتیں گرنے سے 4 افراد جاں بحق جبکہ 7 زخمی ہوئے۔ وزیر اعظم کا کہنا ہے کہ بارشوں اور سیلابی ریلوں میں جاں بحق افراد کے لواحقین کو فی کس 10لاکھ روپے امداد دی جائے گی جس میں سے 50 فیصد رقم وفاق اور باقی صوبے ادا کریں گے۔