بوم بوم آفریدی کی کینسر میں مبتلا بچوں کے ساتھ کھیلتے ہوئے تصاویر وائرل

اسلام آباد:پاکستان کرکٹ ٹیم کے سابق کپتان شاہد آفریدی نے کینسر کی بیماری میں مبتلا بچوں سے ملاقات کی، ان کے ساتھ گھل مل گئے اور کرکٹ بھی کھیلی۔

سابق کپتان شاہد آفریدی نے اپنے سوشل میڈیا اکاؤنٹس پر بچوں سے ہونے والی ملاقات کی تصاویر شیئر کرتے ہوئے لکھا کہ کینسر کسی کی روح اور جذبے کو معذور نہیں کرسکتا۔

ان بچوں کے ساتھ وقت گزار کر پتا چلا کہ اس بیماری سے لڑنے کی طاقت کیا ہوتی ہے۔شاہد آفریدی نے ہسپتال میں بچوں کے ساتھ ناشتہ بھی کیا۔بچے اسٹار کرکٹر کو اپنے درمیان پا کر بہت خوش دکھائی دیئے۔

میں نے ہر بیٹی کے ساتھ اپنی قسمت کو بدلتے ہوئے دیکھا ہے، آفریدی

قومی کرکٹ ٹیم کے سابق کپتان اور سماجی کارکن شاہد آفریدی نے کہا تھا کہ خوش قسمت ہوں، اللہ نے بیٹیوں سے نوازا ہے، انہوں نے کہا کہ بیٹا نہ ہونے کا کوئی دکھ نہیں۔

قومی ٹیم کے سابق کپتان شاہد آفریدی کی بیٹیاں انشا، اقصیٰ، اسمارہ، اجوہ اور سب سے چھوٹی اروا آفریدی جو ابھی محض ایک یا ڈیڑھ برس کی ہے۔ شاہد آفریدی اپنی پانچوں بیٹیوں سے بے انتہاء محبت کرتے ہیں۔

شاہد آفریدی نے ایک نجی چینل کو انٹرویو دیتے ہوئے کہا تھا کہ خوش قسمت ہوں خدا نے مجھے بیٹیوں سے نوازا اور میں نے ہر بیٹی کے ساتھ اپنی قسمت کو بدلتے ہوئے دیکھا ہے۔

شاہد آفریدی کا دوران انٹرویو کہنا تھا کہ ہم پٹھانوں میں بھی اولاد نرینہ پر زور دیا جاتا ہے۔ یہاں تک کہ لوگ بیٹا ہونے کے لیے تعویذ وغیرہ بھی بنواتے ہیں۔ لیکن میں ان تمام چیزوں کے سخت خلاف ہوں۔

انہوں نے کہا کہ اللہ تعالیٰ قرآن میں فرماتا ہے میں جس کو اولاد دیتا ہوں اس کو کہتا ہوں اب جاؤ فکر نہ کرو کیونکہ باپ کا سہارا میں بنوں گا،لہٰذا ان باتوں کو غلط تو نہیں کہا جاسکتا، قرآن پر ہمارا ایمان اور یقین ہے۔اور مسلمان ہونے کے ناطے ہمیں ہر وقت اللہ تعالیٰ کا شکر ادا کرنا چاہئے۔

سابق سپر اسٹار آل راؤنڈر نے کہا کہ میری بیوی کو پتہ ہے کہ میں اپنی بیٹیوں سے بے حد پیار کرتا ہوں اور میں اپنی بیوی کو بھی سمجھاتا ہوں جس کی وجہ سے میری بیوی بھی اس بات سے مطمئن ہے کہ ہمارا بیٹا نہیں ہے۔انہوں نے کہا کہ میں اپنی بیوی سے کبھی بیٹا نہ ہونے کا شکوہ نہیں کیا۔

شاہد آفریدی کا کہنا تھا کہ میں سمجھتا ہوں اللہ تعالی نے باپ اور بیٹی کا اور ماں اور بیٹے کا رشتہ بنایاہے۔ پہلے میری بیوی کو بھی بیٹا نہ ہونے کی کمی محسوس ہوتی تھی لیکن بعد میں اس کو اسلیے فکر نہیں ہوئی کیونکہ اس کا شوہر مطمئن ہے اور اسے کوئی مسئلہ نہیں کہ بیٹا ہے یا نہیں۔یہ سب کچھ اللہ کے ہاتھ میں ہوتا ہے۔