پرویز الٰہی کا تحریکِ انصاف کو استعفوں پر نظرِ ثانی کا مشورہ

اسلام آباد: اسپیکر پنجاب اسمبلی چوہدری پرویز الٰہی نے تحریکِ انصاف کو قومی اسمبلی سے مستعفی ہونے کے فیصلے پر نظرِ ثانی کا مشورہ دے دیا ہے۔

تفصیلات کے مطابق نائب چیئرمین تحریکِ انصاف شاہ محمود قریشی اور ق لیگ کے سینئر مرکزی رہنما چوہدری پرویز الٰہی کے مابین ملاقات میں ملک کی سیاسی صورتحال اور لانگ مارچ کی کال سمیت دیگر امور پر گفتگو ہوئی۔اس موقعے پر شاہ محمود قریشی کے صاحبزادے زین قریشی بھی موجود تھے۔

  یہ بھی پڑھیں:

عمران خان کی گرفتاری کا خواب دیکھنے والے حکومت کی فکر کریں۔پرویز الٰہی

اس موقعے پر پی ٹی آئی کو استعفوں پر نظرِ ثانی کا مشورہ دیتے ہوئے چوہدری پرویز الٰہی نے کہا کہ تحریکِ انصاف ایوان سے باہر رہ کر اپنے لیے مزید مشکلات پیدا کرے گی۔ سابق حکمراں سیاسی جماعت کو پارلیمان کے اندر اور باہر شہباز شریف حکومت کے خلاف بھرپور اپوزیشن کرنی چاہئے۔

خیال رہے کہ اس سے قبل ق لیگ کے مرکزی رہنما و اسپیکر پنجاب اسمبلی چوہدری پرویز الٰہی نے کہا کہ عمران خان کی گرفتاری کا خواب دیکھنے والے حکومت کی فکر کریں۔ آزادی لانگ مارچ کی تیاریاں کی جارہی ہیں۔

 اسپیکر پنجاب اسمبلی چوہدری پرویز الٰہی نے گزشتہ ماہ میڈیا سے گفتگو کرتے ہوئے کہا کہ مہنگائی بم کی دوسری قسط جون میں آجائے گی۔ خواب دیکھنے پر پابندی نہیں تاہم عمران خان کی گرفتاری کاخواب دیکھنے والے اپنی حکومت کی فکر کریں۔