کراچی کی ہر سڑک پر جگہ جگہ گندگی کے ڈھیر، لوگ بدترین اذیت سے دوچار ہیں، حافظ نعیم الرحمٰن

تفصیلات کے مطابق ادارہ نور حق میں پریس کانفرنس کرتے ہوئے حافظ نعیم الرحمٰن نے کہا کہ شہر کے سیاسی ایڈمنسٹریٹر مرتضیٰ وہاب صوبائی وزراء کے ساتھ دورے کررہے ہیں، مرتضیٰ وہاب کو کسی چنگچی رکشے میں بٹھا کر شہر کا حال دکھایا جائے۔

امیر جماعت اسلامی کراچی نے کہا کہ ڈسٹرکٹ سینٹرل کی کوئی مرکزی شاہراہ ایسی نہیں جو ٹوٹی ہوئی نہ ہو، راشد منہاس روڈ اور یونیورسٹی روڈ کا برا حال ہے۔

حافظ نعیم الرحمٰن کا کہنا تھا کہ شہر کی ہر سڑک پر جگہ جگہ گندگی کے ڈھیر ہیں، اندرونی گلیوں میں برسات اور گٹر کا پانی اب تک کھڑا ہے، پوش اور مضافاتی علاقے سب کا برا حال ہے۔

انہوں نے کہا کہ ڈیفنس سے سرجانی اور لانڈھی، کورنگی سے اولڈ سٹی سب جگہ بد ترین صورتحال ہے، پارٹی جھنڈے لگا کر ہونے والا تمام کام پانی میں بہہ گیا ہے۔