پی سی بی کوڈومیسٹک کرکٹ میں اداروں کا کردار بحال کرنا چاہئے، سعید اجمل

لاہور: سابق ٹیسٹ کرکٹر سعید اجمل نے کہا ہے کہ پی سی بی میں اب کچھ دکھانے کا وقت ہے، تبدیلیاں بہت ہوچکی ہیں، سابق آف اسپنر کا کہنا تھا کہ ماضی میں بھی ڈومیسٹک کرکٹ کی بہتری کے لیے بہت دعوے کیے گئے، اب نیشنل ہائی پرفارمنس سینٹر میں تبدیلیوں کے مثبت نتائج سامنے آنے چاہئیں۔

انہوں نے کہا کہ ماضی میں بھی تبدیلیاں کی گئیں مگر اس کے بہتر نتائج سامنے نہیں آسکے۔ سعید اجمل کا کہنا تھا کہ ندیم خان، ثقلین مشتاق اور گرانٹ بریڈ برن تجربہ کار ہیں، بہتر انداز میں کام کرسکتے ہیں۔

ڈومیسٹک کرکٹ کے اہل دو سوکھلاڑیوں کو بھی وقفے وقفے سے پولز میں تقسیم کرکے خصوصی کیمپس لگانے کا اہتمام ہونا چاہیے۔ ان کی فٹنس اور،سکل میں بہتری پر کام کریں۔ہمارے ملک میں ٹیلنٹ کی کمی نہیں۔

سعید اجمل کا کہنا تھا کہ فرسٹ الیون کے ساتھ سیکنڈ الیون میں کارکردگی دکھانے والے کھلاڑیوں پر بھی توجہ دینا ہوگی۔ڈومیسٹک کھلاڑیوں کے معاوضوں میں اضافے سے کھلاڑیوں کے مسائل حل کرنے میں مدد ملے گی۔

انہوں نے کہا کہ پی سی بی کوڈومیسٹک کرکٹ میں اداروں کا کردار بحال کرنا چاہئے۔ اداروں کوکسی ایک فارمیٹ میں ہی کھیلنے کا موقع دیں اس طرح کھلاڑیوں کا روز گار بحال ہو گااور نیا ٹیلنٹ سامنے آئے گا۔