گوگل نیوز پر ہمیں فالو کریںلاہور : ملک میں کورونا وائرس کی وجہ سے لاک ڈاؤن کے باعث پاکستان کرکٹ بورڈ نے سینٹرل کنٹریکٹ کے حامل کھلاڑیوں کے آن لائن فٹنس ٹیسٹ شروع کردیئے ہیں ۔
پیر کو حارث سہیل ، حسن علی ، محمد عباس ، اسد شفیق ، سرفراز احمد ، عماد وسیم اور شاداب خان کافٹنس ٹیسٹ لیا گیا جبکہ باقی کھلاڑی منگل کو ٹیسٹ میں شریک ہوئے۔
گزشتہ ہفتے اسی طرح کی ورزش کے دوران بیٹسمین صہیب مقصود کی ٹانگ میں چوٹ لگنے کے باوجود پی سی بی نے آن لائن ٹیسٹ کا سلسلہ جاری رکھا ہوا ہے جبکہ بورڈ نے گذشتہ ہفتے کھلاڑیوں کا فٹنس ٹیسٹ بھی شروع کیا تھا۔
پی سی بی کا کہنا ہے کہ قومی ٹیم کھلاڑیوں کی فٹنس کی جانچ کرنے کیلئے آن لائن ٹیسٹ کا ڈیزائن یاسر ملک نے تیار کیا ہے اور ٹیسٹ کی نگرانی ہیڈ کوچ اور چیف سلیکٹر مصباح الحق کر رہے ہیں۔
پی سی بی کے ایک عہدیدار نے بتایا کہ یاسر ملک انٹرنیٹ اور ویڈیو اسٹریمنگ کے ذریعے کھلاڑیوں سے رابطے میں ہیں اور وہ انفرادی طور پر فٹنس ٹیسٹوں کی بھی نگرانی کر ر ہے ہیں۔
علاقائی ٹیموں کی نمائندگی کرنے والے کھلاڑیوں کے ٹیسٹ ان کی متعلقہ ٹیم کے ٹرینرز لے رہے ہیں۔ یہ ٹیسٹ کھلاڑیوں کے مرکزی معاہدے کا حصہ ہیں اور جون کے پہلے ہفتے میں کھلاڑیوں کو دوبارہ فٹنس ٹیسٹ دینا پڑے گا۔
اس سے قبل ہیڈ کوچ مصباح الحق نے کہا تھا کہ کورونا کے بعد کرکٹ دوبارہ شروع ہوتی ہے تو کھلاڑیوں کو اعلیٰ جسمانی چیلنجوں کے لئے تیار رہنا ہوگا۔
پاکستان نے نیدرلینڈ ، آئرلینڈ اور انگلینڈ کیخلاف سیریز کھیلنا تھی تاہم کورونا وائرس کے باعث ان سیریز کے انعقاد کے حوالے سے غیر یقینی صورتحال پیدا ہوگئی ہے۔
مزید پڑھیں:رافیل نڈال لاک ڈاؤن کی وجہ سے پریشان، راجر فیڈرر نے گھٹنے کی سرجری کرالی
