کینیڈا کے دارالحکومت اٹاوا میں پاکستانی ٹرک آرٹ نے دیکھنے والوں کے دل موہ لئے

 کینیڈا کے دارالحکومت اٹاوا میں پاکستان کے مشہور ٹرک آرٹ کلچر کی نمائش ہوئی، جس نے دیکھنے والوں کی بھرپور دلچسپی حاصل کی۔

تفصیلات کے مطابق اٹاوا کے مصروف ترین کمرشل حصے میں پاکستان کے مشہور اور روایتی ٹرک آرٹ کی نمائش کا اہتمام کیا گیا جس میں پاکستان کے سفیر ظہیر اے جنجوعہ اور اٹاوا شہر کے میئر جم واٹسن کےعلاوہ شہر کے کونسلرز، کینیڈین حکام اور شہریوں کی بڑی تعداد نے شرکت کی۔

نمائش میں شریک شرکا نے پاکستانی فنکاروں کو شہر کی مصروف شاہراہ پر واقع بلند دیوار پر پاکستان ٹرک آرٹ کی نمائندہ خوبصورت، رنگ برنگی پھول پتیاں، نمونہ جات اورنقش و نگار بناتے ہوئے دیکھا۔

پاکستانی سفیر ظہیر اے جنجوعہ نے تقریب سے خطاب کرتے ہوئے کہا کہ پاکستان کا ٹرک آرٹ ہماری ثقافت اور سماجی ڈھانچے کا اہم ترین جزو بن چکا ہے اور اب یہ فن ٹرکوں اور بسوں سے گھروں کی دیواروں اور آرٹ گیلریوں سے ہوتا ہوا اپنی خوبصورتی اور دیدہ زیب رنگوں کے بدولت دنیا بھر میں آرٹ کے دلدادہ شائقین کی توجہ کا مرکز بن چکا ہے۔

انہوں نے کہا کہ پاکستان اور کینیڈا کے مابین گرم جوشی پر مبنی قریبی اور مضبوط تعلقات استوارہیں اوردونوں ممالک اس سال اپنے سفارتی تعلقات کے قیام کی 75 ویں سالگرہ منارہے ہیں جس کوبھرپور انداز سے منانے اور کینیڈا میں پاکستان کی ثقافت کو اجاگر کرنے کے لیے ٹرک آرٹ نمائشوں سمیت دیگر کئی پروگرام ترتیب دیے گئے۔

پاکستانی سفیرظہیر اے جنجوعہ نے اپنے خطاب میں کینیڈا میں مقیم پاکستانی کمیونٹی کو بھی دونوں ملکوں کے مابین پل کا کردار ادا کرنے اور دو طرفہ تعلقات کو مضبوط بنانے میں اپنا بھرپور کردار ادا کرنے پر خراج تحسین پیش کیا۔

اُن کا کہنا تھا کہ دنیا بھر کی طرح کینیڈا میں مقیم پاکستانی اور پاکستان نژاد کینیڈینزپاکستان کا اثاثہ ہیں اور دونوں ممالک کے درمیان عوامی رابطوں کو مضبوط بنانے کا اہم ذریعہ ہے۔

تقریب سے خطاب میں اٹاوا شہر کے میئرجم واٹسن نے دارالحکومت کی اور شہرکی مشہور شاہراہ پر مقامی آبادی اور سیاحوں کی دلچسپی کے لیے پاکستانی ٹرک آرٹ کا ایک دیدہ زیب نمونہ تیار کرنے پر پاکستان ہائی کمیشن اور پاکستانی فنکاروں کا شکریہ ادا کیا۔

انہوں نےاپنے خطاب میں پاکستان اور کینیڈا کے مابین تعلقات کو بہت مضبوط اور مثبت قرار دیا۔

قبل ازیں کینیڈا کےسینٹ میں بھی پاکستان ٹرک آرٹ کی نمائش کا اہتمام کیا گیا جس میں لگ بھگ 2 درجن کینیڈین سینٹرزاورارکان پارلیمان نے شرکت کی۔