گوگل نیوز پر ہمیں فالو کریںپاکستان نے اقوام متحدہ کی سلامتی کونسل کے غیرمستقل رکن کے طور پر بھاری اکثریت کے ساتھ کامیابی حاصل کرلی ہے۔
انتخابات میں پاکستان نے جنرل اسمبلی میں 193 میں سے 182 ووٹ حاصل کیے، جو کہ 124 ووٹوں کی مطلوبہ دو تہائی اکثریت سے نمایاں طور پر زیادہ ہیں۔
جنرل اسمبلی ہال تالیوں سے گونج اٹھا جب اس کے صدر ڈینس فرانسس نے پانچ غیر مستقل نشستوں کے فاتحین کا اعلان کیا: پاکستان، ڈنمارک، یونان، پاناما اور صومالیہ۔ یہ ممالک جاپان، ایکواڈور، مالٹا، موزمبیق اور سوئٹزرلینڈ کی جگہ لیں گے، جن کی مدت 31 دسمبر کو ختم ہو گی۔ صدر فرانسس نے نومنتخب اراکین کو ان کی جیت پر مبارکباد دی۔
پاکستان کونسل میں اپنی آٹھویں مدت کے موقع پریکم جنوری 2025 کو جاپان سے ایشیائی نشست پر قبضہ حاصل کرے گا۔
ہال سے باہر نکلتے ہی اقوام متحدہ میں پاکستان کے مستقل نمائندے منیر اکرم سے اے پی پی کے نمائندے نے 15 رکنی کونسل کے رکن کی حیثیت سے پاکستان کی ترجیحات اور اہداف کے بارے میں پوچھا۔
سفیر اکرم جواب دیتے ہوئے نے کہا کہ پاکستان کا انتخاب اقوام متحدہ کے چارٹر کے مقاصد اور اصولوں کو برقرار رکھنے کی پاکستان کی صلاحیت پر عالمی برادری کے اعتماد کی عکاسی کرتا ہے۔
انہوں نے اس بات پر زور دیا کہ پاکستان اقوام متحدہ کے چارٹر کے مطابق مشترکہ مقاصد بالخصوص تنازعات کی روک تھام اور پرامن حل پر توجہ مرکوز کرنے کے لیے کونسل کے دیگر اراکین کے ساتھ فعال طور پر تعاون کرے گا۔
پاکستان نے اس سے قبل 2012-13، 2003-04، 1993-94، 1983-84، 1976-77، 1968-69، اور 1952-53 میں کونسل میں خدمات انجام دیں۔
