گوگل نیوز پر ہمیں فالو کریںراولپنڈی ٹیسٹ کے پہلے روز پاکستانی اسپنرز کی شاندار کارکردگی کی بدولت انگلینڈ کی ٹیم پہلی اننگز میں 267 رنز پر ڈھیر ہوگئی۔ دن کے اختتام تک پاکستان نے 3 وکٹوں کے نقصان پر 73 رنز بنا لیے ہیں۔
قومی ٹیم کو 194 رنز کے خسارے کا سامنا ہے۔ انگلینڈ کے کپتان بین اسٹوکس نے ٹاس جیت کر بیٹنگ کا فیصلہ کیا، لیکن اسپنرز نے ابتدائی وکٹیں جلدی حاصل کر کے انگلش بیٹنگ لائن کو مشکلات میں ڈال دیا۔ پاکستان کی طرف سے ساجد خان نے 6، نعمان علی نے 3، اور زاہد محمود نے ایک وکٹ حاصل کی۔
انگلش ٹیم کی اننگز کا آغاز بین ڈکٹ اور زیک کرالی نے 56 رنز کی شراکت سے کیا۔ تاہم، پاکستانی اسپنرز کے سامنے دیگر کھلاڑی جم نہ سکے اور آدھی ٹیم 98 رنز پر پویلین لوٹ گئی۔ بین ڈکٹ نے 52 اور زیک کرالی نے 29 رنز بنائے جبکہ ساجد خان نے بین ڈکٹ سمیت دیگر بیٹرز کو پویلین واپس بھیجا۔ جیمی اسمتھ نے گس ایٹکنسن کے ساتھ مل کر 105 رنز کی اہم شراکت قائم کی، لیکن اسمتھ 89 رنز پر اپنی سنچری مکمل نہ کر سکے۔
پاکستانی اننگز کے آغاز میں عبد اللہ شفیق جلدی آؤٹ ہوگئے اور 14 رنز بنا کر ریحان احمد کا شکار بنے۔ صائم ایوب 19 رنز بنا کر پویلین لوٹ گئے جبکہ کامران غلام صرف 3 رنز بنا کر آؤٹ ہوئے۔ اس موقع پر کپتان شان مسعود اور سعود شکیل نے کریز پر سنبھالا اور 16، 16 رنز کے ساتھ کھیل کے اختتام تک موجود رہے۔ تین میچوں کی سیریز کے آخری ٹیسٹ میں پاکستان کو 194 رنز کا خسارہ کم کرنے کا چیلنج درپیش ہے۔
ٹاس کے بعد قومی کپتان شان مسعود نے کہا کہ ٹاس ہمارے ہاتھ میں نہیں ہوتا، لیکن ہم اچھی کرکٹ کھیلنے کی کوشش کر رہے ہیں۔ انہوں نے تسلسل کے ساتھ بہتر کارکردگی دکھانے پر زور دیا۔ انگلینڈ کے لیے دوسری اننگز میں واپس آنا چیلنج ہوگا جبکہ پاکستانی بیٹرز کو محتاط رہ کر بیٹنگ کرنا ہوگی۔
