گوگل نیوز پر ہمیں فالو کریںپاکستان ریلوے نے اعلیٰ حکام کیلئے مخصوص لگژری سیلون کوچز اب عوام کے لیے بکنگ کے لیے کھول دیے ہیں اور اس کے ساتھ ہی ان کوچز کے کرایوں کا بھی باقاعدہ اعلان کر دیا گیا ہے جن میں وزیرِاعظم کا مخصوص سیلون بھی شامل ہے۔
ترجمان پاکستان ریلوے کے مطابق وزیرِاعظم سیلون کا کرایہ کراچی سے لاہور کے لیے 6 لاکھ روپے جبکہ اسلام آباد سے لاہور کے لیے ڈیڑھ لاکھ روپے مقرر کیا گیا ہے۔
اسی طرح دیگر لگژری سیلونز کے لیے کراچی سے لاہور کا کرایہ 4 لاکھ روپے اور اسلام آباد سے لاہور کا کرایہ 1 لاکھ روپے رکھا گیا ہے۔
ترجمان نے مزید بتایا کہ یہ کرایے مکمل بکنگ اور خصوصی سہولیات کے ساتھ سفر کے لیے ہیں۔ ان کوچز میں جدید سہولیات، مکمل پرائیویسی اور آرام دہ سفر کی ضمانت دی گئی ہے۔
یاد رہے کہ اس سے قبل یہ لگژری سیلونز صرف اعلیٰ حکومتی شخصیات کے لیے مخصوص تھے تاہم وزیراعظم شہباز شریف کی ہدایت پر انہیں عوام کے لیے کھول دیا گیا ہے تاکہ عام مسافروں کو پریمیم سطح کی سفری سہولتیں فراہم کی جا سکیں اور ریلوے کے دستیاب وسائل کا مؤثر استعمال ممکن بنایا جا سکے۔
ریلوے حکام کے مطابق پانچ لگژری سیلونز جو پہلے صرف وزیراعظم، وفاقی وزراء، اور ریلوے کے اعلیٰ افسران مثلاً چیئرمین، سی ای او، اور آئی جی کے استعمال میں تھے، اب اہم بین الصوبائی روٹس جیسے کراچی تا لاہور، لاہور تاکراچی، اسلام آبادسے لاہور، اور لاہورسے اسلام آباد کے لیے بکنگ پر دستیاب ہوں گے۔
