پاکستانی سفارتکاروں کو ہراساں کرنےکامعاملہ، افغان ناظم الامور دفترخارجہ طلب

اسلام آباد: افغانستان میں پاکستانی سفارتکاروں کو ہراساں کیے جانے کے معاملے پر افغان ناظم الامور کو دفتر خارجہ طلب کرکے شدید تحفظات کا اظہار کیا گیا ہے۔

ترجمان دفتر خارجہ ڈاکٹر محمد فیصل کی جانب سے جاری بیان کے مطابق افغان ناظم الامور کو کابل میں پاکستان کے سفارت خانے اور ذیلی دفاتر کے سفارتی عملے کو درپیش حفاظتی اور سیکیورٹی خدشات پر شدید تحفظات کے اظہار کے لیے طلب کیا گیا۔

ترجمان نے کہا کہ سفارتخانے کی طرف آنے والے سفارتی عملے کی گاڑیوں کو موٹر سائیکل سے ٹکر ماری گئی، افغان حکومت پاکستانی سفارتکاروں کے تحفظ کی ذمہ داری پوری کرے،گذشتہ 2 روز سے مسلسل پاکستانی سفارتکاروں کو ہراساں کیا جا رہا ہے۔

افغان ناظم الامور کو یاددہانی کرائی گئی کہ سفارتی استحقاق اور استثنیٰ کے ویانا کنونشن 1961حصہ ہونے کے ناطے یہ افغان حکومت کی ذمہ داری ہے کہ مشن کے تمام اراکین کی محفوظ اور آزادانہ نقل و حرکت اور سکیورٹی کو یقینی بنائے۔

پاکستان نے افغانستان سے معاملے کی تحقیقات کا مطالبہ کرتے ہوئے کہا ہے کہ معاملے کی تحقیقاتی رپورٹ پاکستان سے بھی شیئر کی جائے اور اس بات کو یقینی بنایا جائے کہ مستقبل میں ایسے واقعات کو رونما ہونے سے روکا جا ئے۔