پاکستان اور چین افغانستان کی تعمیرِ نو میں مدد کیلئے تیار ہیں، چینی وزیر خارجہ

اسلام آباد: چینی وزیر خارجہ چن گانگ نے کہا ہے کہ چین اور پاکستان افغانستان کی تعمیرِ نو میں مدد کے لئے تیار ہیں۔

چینی وزیر خارجہ چن گانگ نے کہا کہ میرا پاکستان کا پہلا دورہ ہے، پاکستان کی بہترین مہمان نوازی کا مشکور ہوں۔ انہوں نے کہا کہ گزشتہ سال وزیراعظم شہباز شریف نے چین کا کامیاب دورہ کیا،اس موقع پر چینی وزیر خارجہ نے بلاول بھٹو کو دورہ چین کی دعوت بھی دی۔

چینی وزیر خارجہ نے کہا کہ چین دہشت گردی کے خلاف جنگ میں پاکستان کی خدمات کو قدر کی نگاہ سے دیکھتا ہے، امید ہے کہ ہمارے دوستانہ تعلقات اور مذاکرات مستقبل میں جاری رہیں گے۔

یہ بھی پڑھیں:

پاکستان ہر عالمی فورم پر چین کے مفادات کی حمایت جاری رکھے گا، بلاول بھٹو زرداری

ان کا مزید کہنا تھا کہ پاکستان میں چینی شہریوں کے تحفظ کے لیے اقدامات کے حوالے سے وزیر خارجہ بلاول نے آگاہ کیا ہے، پاکستان اور چین میں باہمی پروازیں نارمل ہوچکی ہیں، پاکستان اور چین میں پروازوں کی صورتحال کویڈ سے پہلے کی پوزیشن پر آچکی ہے، دونوں ممالک سی پیک پر پیشرفت پر مطمئن ہیں اور پاکستانی مصنوعات کے لیے چین کی مارکیٹ دستیاب ہے۔

چینی وزیر خارجہ نے سہ فریقی مذاکرات کے حوالے سے بات کرتے ہوئے کہا کہ خطے کے ممالک میں افغانستان کے معاملے پر اتفاقِ رائے پیدا کریں گے، پاکستان اور چین افغانستان کی تعمیر نو میں مدد کے لیے تیار ہیں، امید ہے افغانستان پڑوسیوں کے دہشت گردی خدشات کو سنجیدگی سے لے گا اور سہ فریقی مذاکرات کامیاب ہوں گے۔