پاک آسٹریلیا سیریز، فیصلہ کن ٹیسٹ میچ آج سے شروع ہوگا

پاکستان اور آسٹریلیا کے درمیان سیریز کا تیسرا اور آخری ٹیسٹ میچ آج سے لاہور کے قذافی اسٹیڈیم میں کھیلا جائے گا، میچ آج صبح 10 بجے شروع ہوگا۔

قذافی اسٹیڈیم لاہور میں 13 سال بعد ٹیسٹ میچ کھیلا جائے گا، اس وینیو پر پاکستان نے 40 میچز کھیلے ہیں جن میں 12 بار جیت حاصلی کی اور 6 میں شکست ہوئی جبکہ 22 مقابلے ڈرا ہوئے۔

پاکستان کرکٹ ٹیم کے کپتان بابر اعظم پہلی مرتبہ قذافی اسٹیڈیم میں ایکشن میں نظر آئینگے۔

کپتان بابر اعظم پری میچ ورچوئل پریس کانفرنس میں سیریز جیتنے کے لئے پرعزم نظر آئے، اس موقع پر انہوں نے کہا کہ ہوم گراؤنڈ میں کرکٹ کھیلنے کا مزہ ہی کچھ اور ہوتا ہے، تمام کھلاڑی آسٹریلیا کیخلاف سیریز جیتنے کیلئے پُر عزم ہیں۔

ان کا مزید کہنا تھا کہ پچ زیادہ مختلف نہیں لگ رہی لیکن لگتا ہے کہ پچ پر گیند ٹرن ہوگی۔

یہ بھی پڑھیں:بابر اعظم کی 196 رنز کی اننگز صدی کی بہترین میچ بچانے والی اننگز میں شامل

بابر اعظم کا کہنا تھا کہ قذافی اسٹیڈیم میں 13 سال بعد ٹیسٹ میچ ہونے جارہا ہے، ہوم گراؤنڈ پر کھیلنے کے احساسات بیان نہیں کرسکتا، فتح حاصل کرنے کی بھرپور کوشش کرینگےجبکہ آسٹریلیا کے کپتان پیٹ کمنز نے لاہور ٹیسٹ میں ریورس سوئنگ کا کردار اہم قرار دیتے ہوئے کہا ہے کہ سیریز جیتنے کے لئے پراعتماد ہیں، ہم نے آپشنز پر غور کیا لیکن ہم سمجھتے ہیں کہ یہی الیون بہتر ہے۔

خیال رہے کہ اس سے قبل پاکستان اور آسٹریلیا کے درمیان دو ٹیسٹ میچ کھیلے گئے تھے جن میں سے پنڈی اور کراچی میں کھیلے جانے والے دونوں ٹیسٹ میچ ڈرا ہوگئے تھے۔