پبلک اکاؤنٹس کمیٹی کا اجلاس، جاوید اقبال کے خلاف تحقیقات کا حکم

اسلام آباد: پبلک اکاؤنٹس کمیٹی نے سابق چیئرمین نیب جاوید اقبال کے خلاف تحقیقات کا حکم دے دیا ہے۔

تفصیلات کے مطابق گزشتہ روز چیئرمین نور عالم خان کی زیرِ صدارت پبلک اکاؤنٹس کمیٹی کے اجلاس میں سابق چیئرمین نیب  کے خلاف تحقیقات کا حکم دیا گیا۔ جاوید اقبال کو لاپتہ افراد کمیشن کی سربراہی سے بھی ہٹانے کی سفارش کردی گئی۔

یہ بھی پڑھیں:

عائشہ گلالئی کی عمران خان کے خلاف مقدمے کی درخواست

گزشتہ روز سابق چیئرمین نیب پبلک اکاؤنٹس کمیٹی کے اجلاس میں شریک نہیں ہوئے جس پر چیئرمین پی اے سی نور عالم خان نے برہمی کا اظہار کرتے ہوئے کہا کہ اگر جاوید اقبال دوبارہ نہ آئے تو ان کے وارنٹ جاری کردوں گا۔

چیئرمین پی اے سی نور عالم خان نے کہا کہ ہمیں پبلک آفس کا غلط استعمال روکنا ہوگا۔ نیب میں بہت اچھے لوگ کام  کرتے ہیں مگر وہاں کچھ بھیڑئیے بھی ہوتے ہیں۔ واضح رہے کہ جاوید اقبال کے دور میں متعدد اپوزیشن رہنما پیشیاں بھگتتے نظر آئے۔

موجودہ وزیر اعظم شہباز شریف، وزیر اعلیٰ پنجاب حمزہ شہباز، پیپلز پارٹی کے شریک چیئرمین اور سابق صدر آصف علی زرداری اور سابق وزیر اعظم شاہد خاقان عباسی سمیت متعدد رہنماؤں نے سابق چیئرمین نیب جاوید اقبال کے دور میں ہی پیشیاں بھگتیں۔