گوگل نیوز پر ہمیں فالو کریںکراچی: ساحلِ سمندر پر پھنسے ہوئے بحری جہاز کو نکالنے کیلئے آپریشن شروع کردیا گیا ہے جو گزشتہ روز موسمی خرابی کے باعث تعطل کا شکار رہا۔
تفصیلات کے مطابق کراچی کے علاقے سی ویو میں ساحلِ سمندر پر پھنسے بحری جہاز کو نکالنے کیلئے آپریشن شروع کردیا گیا۔ جہاز کے اطراف سے ریت نکالنے کا کام جاری ہے۔
ساحلِ سمندر پر پھنسے بحری جہاز کو نکالنے کیلئے آپریشن میں میری ٹائم سیکیورٹی، پاک بحریہ اور کے پی ٹی کی ٹیمیں حصہ لے رہی ہیں۔
گزشتہ روز سمندر میں طغیانی اور موسمی صورتحال کے باعث ساحلِ سمندر پر پھنسے بحری جہاز کو نکالنے کا آپریشن روک دیا گیا تھا۔
پاک بحریہ کی ٹیم 24 گھنٹے بحری جہاز کی نگرانی میں مصروف ہے۔ حکام کا کہنا ہے کہ بحری جہاز کو نکالنے کا عمل جلد مکمل کر لیا جائے گا۔
خیال رہے کہ گزشتہ روز کراچی میں سی ویو پر پھنسے ہوئے بحری جہاز کی ری فلوٹنگ کا آپریشن شروع نہ ہوسکا جس کے جلد شروع ہونے کی پیشگوئی کی گئی۔
شہرِ قائد کے ساحل (سی ویو) پر پھنسے بحرہ جہاز کی ری فلوٹنگ کے متعلق گزشتہ روز شپنگ ایجنٹ کا کہنا تھا کہ موسم اور سمندری صورتحال بہتر نہ ہونے کے باعث آپریشن شروع نہیں ہوا۔
مزید پڑھیں: ساحل پر پھنسے بحری جہاز کی ری فلوٹنگ کا آپریشن شروع نہ ہوسکا
گزشتہ ماہ کے پی ٹی حکام کا کہنا تھا کہ جہاز کو نکالنے کیلئے طاقتور سالویج ٹگ استعمال کرنا ہوں گے تاہم جہاز کی مالک کمپنی کی طرف سے جہاز نکالنے کی باضابطہ درخواست نہیں کی گئی۔
قبل ازیں کے پی ٹی کو جہاز کی آمد کی اطلاع نہیں کی گئی، کے پی ٹی حکام کا کہنا تھا کہ ٹگ پورٹ آپریشن چھوڑ کر پھنسا ہوا بحری جہاز ریسکیو نہیں کیا جاسکتا۔
مذکورہ بحری جہاز 18 جولائی کے روز سنگاپور سے کریو کی تبدیلی کیلئے آیا تو خراب موسم کی وجہ سے جہاز کا اینکر الگ ہو کر گم ہوگیا جبکہ انجن کمزور تھا۔
لہروں کا زور نہ سہہ سکنے کے باعث جہاز ہچکولے کھاتا ہوا ساحل پر پہنچ کر ریت میں دھنس گیا۔ وفاقی وزیر علی زیدی نے میڈیا کو بتایا کہ جہاز سے تیل کے رساؤ سے بچنے کے انتظامات کرلیے۔
کورونا کے باعث قرنطینہ میں رہنے والے وفاقی وزیر علی زیدی نے کہا کہ میں نے خود کو محدود تو کر لیا ہے لیکن پھنسے ہوئے جہاز کو نکالنے کے منصوبوں کی نگرانی کر رہا ہوں۔
گزشتہ ماہ 25جولائی کے روز جہاز کے متعلق گفتگو کرتے ہوئے وزیرِ بحری امور علی زیدی نے کہا کہ سمندری جہاز پانی میں آدھے میٹر کی سطح پر ہے جسے نکالنے کیلئے 5میٹر کی سطح چاہئے۔
انہوں نے کہا کہ ساحل پر پھنسے ہوئے جہاز کیلئے نیشنل میری ٹائم ڈیزاسٹر کنٹیجینسی پلان فعال کردیا گیا ہے۔ ریگولیشنز کے تحت امدادی کارروائیوں کا ذمہ دار جہاز کا مالک ہوگا۔
یہ بھی پڑھیں: کراچی، ساحل پر پھنسابحری جہاز نکالنے کیلئے سنگاپور سے ماہرین کی آمد
