او آئی سی کے تحت مقبوضہ جموں و کشمیر پر ہنگامی ورچؤل اجلاس آج منعقد ہوگا

اس اجلاس کی صدارت او آئی سی کے سیکریٹری  جنرل ڈاکٹر یوسف الاثمین کریں گے۔ وزیر خارجہ مخدوم شاہ محمود قریشی مقبوضہ کشمیر کی موجودہ صورتحال سے شرکائے اجلاس کو آگاہ کریں گے اور اس معاملے کے مختلف پہلوؤں پر بریفنگ دیں گے۔

اجلاس میں رابطہ گروپ کے دیگر ممبر ممالک کے وزرائے خارجہ بشمول  آذربائیجان ، نائجر ، سعودی عرب اور ترکی کے ساتھ ساتھ او آئی سی آزاد مستقل انسانی حقوق کمیشن (آئی پی ایچ آر سی) کے نمائندوں کی شرکت متوقع ہے۔

ورچوئل اجلاس کے دوران آزاد جموں و کشمیر کے صدر سردار مسعود خان اور کشمیری عوام کے نمائندے بھی شریک ہوں گے اور او آئی سی شرکائے اجلاس کے سامنے اپنا مؤقف رکھیں گے۔ 

جموں و کشمیر سے متعلق او آئی سی رابطہ گروپ کا قیام 1994ء میں عمل میں آیا، جس کا مقصد جموں و کشمیر تنازعے پر مشترکہ اسلامی اقدام کو مربوط کرنا اور او آئی سی کے کشمیر پر مؤقف کو اجاگر کرنا تھا۔مقبوضہ کشمیر میں 5 اگست 2019ء کو بھارت کی غیر قانونی اور یکطرفہ کارروائیوں کے بعد رابطہ گروپ کا یہ تیسرا اجلاس ہے۔

او آئی سی نے جموں وکشمیر کے عوام کو ان کے حق خودارادیت کے حصول کے لئے جدوجہد میں ان کی حمایت کی ہے۔ او آئی سی نے کشمیر کے غمزدہ لوگوں کی حمایت کا اعادہ کرتے ہوئے ہندوستان کی غیر قانونی اور یکطرفہ کارروائیوں کی مذمت اور ان کی تردید کی ہے۔

کشمیر کے لئے او آئی سی کے سکریٹری جنرل کے خصوصی ایلچی ، سفیر یوسف ال ڈوبے پہلے ہی رواں برس مارچ کے دوران کشمیری عوام کی حمایت اور یکجہتی کیلئے لائن آف کنٹرول کے ساتھ صورتحال کے بارے میں  معلومات حاصل کرنے کے لئے پاکستان اور آزاد جموں و کشمیر کا دورہ کیا۔