وزارتِ تعلیم کا بڑا اقدام، پرائمری تک طلبہ و طالبات کے بستے ختم

اسلام آباد: وفاقی حکومت کو بھاری بھرکم بستوں کا بوجھ اٹھانے والے بچوں پر ترس آگیا، وزارتِ تعلیم نے بڑا قدم اٹھاتے ہوئے پرائمری تک طلبہ و طالبات کے بستے ختم کردئیے ہیں۔

تفصیلات کے مطابق بکس فری بیگز پروگرام کے تحت بستوں کو ختم کرنے کا اعلان سامنے آگیا۔ وفاقی پارلیمانی سیکریٹری وجیہہ قمر نے کہا کہ پروگرام صرف اسلام آباد تک محدود نہیں رہے گا بلکہ اسے ملک کے دیگر شہروں تک بھی توسیع دی جائے گی۔

یہ بھی پڑھیں:

اسلام آباد میں کورونا کا خوف، مزید 9تعلیمی ادارے سیل کرنے کا فیصلہ

شہرِ اقتدار میں ایک تقریب سے خطاب کرتے ہوئے پارلیمانی سیکریٹری وجیہہ قمر نے بچوں کو پرائمری کلاسز تک بستوں کی مصیبت سے نجات دلانے کی خوشخبری سنائی۔ ایڈیشنل سیکریٹری تعلیم محی الدین نورانی نے کہا کہ اساتذہ کو محنت کرنا ہوگی۔

وزارتِ تعلیم حکام کا کہنا ہے کہ پرائمری کلاس تک بچوں کو کلاسز میں بستے لانے کی ضرورت نہیں ہوگی۔ پارلیمانی سیکریٹری وجیہہ قمر نے کہا کہ بچوں کی کردار سازی میں اساتذہ کا کردار اہم ہوتا ہے۔ ہمیں بستوں کی بجائے معیاری تعلیم پر توجہ دینا ہوگی۔

پارلیمانی سیکریٹری وجیہہ قمر نے کہا کہ بستوں کا وزن کم کرنے کے ساتھ ساتھ پہلی سے پانچویں جماعت تک کے بچے بچیوں کی اخلاقی تربیت پر توجہ دینے کی ضرورت ہے۔ حکومت ٹیکنالوجی ٹریننگ پروگرام لانے کا ارادہ رکھتی ہے۔

انہوں نے کہا کہ ٹیکنالوجی ٹریننگ پروگرام کے تحت اساتذہ کو تربیت دی جائے گی اور بچوں کے ذہنی و جسمانی مسائل کو ختم کرنے کیلئے بکس فری بیگز پروگرام ہر سطح پر متعارف کرایا جائے گا تاکہ بچوں کو بھاری بھرکم بستوں سے نجات مل سکے۔