عدم اعتماد، وزیر اعظم کے خلاف غیر ملکی سازش کے ثبوت نہ مل سکے

اسلام آباد: وزیرا عظم عمران خان نے الزام عائد کیا ہے کہ ان کے خلاف اپوزیشن کی جانب سے پیش کی گئی تحریکِ عدم اعتماد غیر ملکی سازش کا نتیجہ ہے تاہم ایسی کسی سازش کے ثبوت تاحال دستیاب نہیں ہوسکے۔

تفصیلات کے مطابق ایک مقامی انگریزی اخبار نے ذرائع کے حوالے سے دعویٰ کیا ہے کہ سکیورٹی اسٹیبلشمنٹ نے وزیر اعظم کو آگاہ کیا تھا کہ بیرونی سازش کے کوئی ثبوت نہیں ملے جبکہ وزیر اعظم کا دعویٰ ہے کہ دھمکی آمیز خط ہی بیرونی سازش کا ثبوت ہے۔

یہ بھی پڑھیں:

وزیر اعظم کا شکر گزار ہوں۔مشیر قومی سلامتی کا الوداعی پیغام

گزشتہ ماہ 27مارچ کے روز عوامی جلسے سے خطاب کرتے ہوئے وزیر اعظم نے ایک خط لہراتے ہوئے کہا کہ حکومت گرانے کی کوشش میں بیرونی عناصر ملوث ہیں اور ہمارے کچھ لوگوں کو استعمال کیا جارہا ہے۔ میرے پاس تحریری ثبوت موجود ہے۔

جلسے سے خطاب کے دوران وزیر اعظم نے کہا کہ بیرونِ ملک سے فنڈنگ کی جارہی ہے اور ہمارے کچھ لوگ پاکستان کی خارجہ پالیسی کو باہر سے متاثر کرنے کی سازش کا حصہ بن گئے ہیں، تاہم انگریزی اخبار نے وزیر اعظم کے الزامات بے بنیاد قرار دئیے۔

مذکورہ اخبار نے ذرائع کے حوالے سے دعویٰ کیا کہ اسٹیبلشمنٹ نے حکومت کو آگاہ کیا تھا کہ اپوزیشن کی تحریکِ عدم اعتماد کی سرپرستی میں غیر ملکی عناصر کی موجودگی کے ثبوت نہیں۔ اگر آپ کے پاس ثبوت ہے تو پیش کریں۔ 

قومی سلامتی کمیٹی کے اجلاس میں کی گئی گفتگو بھی میڈیا کے سامنے نہیں لائی گئی جبکہ ملاقات کے منٹس کو اس وقت سرکاری دستاویز سمجھا جاتا ہے جب ان پر تمام شرکاء نے دستخط کیے ہوں جبکہ عسکری قیادت نے منٹس پر دستخط نہیں کیے۔