نواز شریف اور ان کی ٹیم کی بے گناہی ایک ایک کر کے سامنے آرہی ہے،شہباز شریف

لندن: پاکستان مسلم لیگ (ن )کے صدر شہباز شریف نے کہا ہے کہ نیازی نیب گٹھ جوڑ ایک بار پھر ناکام ہوگیا، ہماری نیک نیتی کی گواہی عدالت عظمیٰ میں بھی سنی گئی، نواز شریف اور ان کی ٹیم کی بے گناہی ایک ایک کر کے سامنے آرہی ہےاللہ کا شکر ہے جس نے سچ اور جھوٹ کو الگ الگ کر کے دکھا دیا۔

لندن میں پریس کانفرنس کرتے ہوئے شہباز شریف نے کہا کہ وزیراعظم عمران خان اور قومی احتساب بیورو (نیب) کے گٹھ جوڑ سے میرے اثاثے منجمد کیے گئے ہیں۔انہوںنے کہاکہ میں نے ہمیشہ کہا کہ عمران نیازی اور نیب کا گٹھ جوڑ ہے، اللہ تعالیٰ نے گزشتہ رور سپریم کورٹ میں ہمیں سرخرو کیا۔

شہباز شریف نے کہا کہ صاف پانی کیس میں بلا کر آشیانہ کیس میں گرفتار کر لیا گیا اور دونوں مقدمات میں میرٹ پرضمانت ہوئی لیکن نیب نے چیلنج کر دیا تھا۔صدر مسلم لیگ (ن) نے کہا کہ ملک کی سیاسی صورت حال پر تشویش ہے، مقبوضہ کشمیر میں ظلم و بربریت جاری ہے اور مسئلہ کشمیر اجاگر کرنے کے لیے یک جہتی ضروری ہے۔

انہوں نے کہاکہ ہم چاہتے ہیں کشمیری بہنوں اور بھائیوں کے کاز کے لیے اٹھ کھڑے ہوں گے اور ان کی آواز اور کاز کو پوری دنیا میں اجاگر کرنے کے لیے پاکستان میں اتحاد کی ضرورت ہے۔شہباز شریف نے کہا کہ اللہ تعالیٰ کا لاکھ لاکھ شکر ہے کہ گزشتہ روز ایک مرتبہ پھر جھوٹ اور سچ کو الگ کرکے دکھا دیا اورآج سچائی کی تیز روشنی کو پوری قوم دیکھ رہی ہے۔

مزید پڑھیں: آشیانہ اقبال ہاؤسنگ ، شہباز شریف کے خلاف کیس ثابت نہ ہونے پر درخواست واپس

انہوں نے کہاکہ اللہ نے ہمیں عدالت عظمیٰ میں سرخرو کیا اور پوری قوم نے دیکھا کہ ہماری نیک نیتی کی گواہی کی آواز عدالت عظمیٰ میں سنائی دی گئی۔مسلم لیگ (ن) کے صدر نے کہا کہ گزشتہ روز میری ضمانت کو منسوخ کرنے کے حوالے سے عمران خان نیازی اور نیب نے درخواست دی، ہمیشہ کہتا رہا یہ گٹھ جوڑ ہے مگر اب تو اس میں کوئی شک نہیں رہا۔

انہوں نے کہا کہ نعیم بخاری وکیل ہیں اور وہ پی ٹی آئی کی اندرونی ٹیم اور پی ٹی آئی کا حصہ ہیں اور انہوں نے ضمانت منسوخی کی نیب درخواست پر وہ پیش ہوئے حالانکہ نیب کے پاس پراسیکیوٹر کی فوج ظفر موج ہے اس کو نیب نے ایک طرف کیا اور میرے ساتھ الفت کا ثبوت یہ دیا اور پی ٹی آئی کے رکن نعیم بخاری کو عدالت میں مقدمے کا دفاع کیا۔

شہباز شریف نے کہا کہ عدالت عظمیٰ نے جو سوالات کیے وہ سب کچھ پوری قوم نے ٹی وی پر سنا اور اخبارات میں سب چھپ چکا ہے۔ انہوں نے کہاکہ عدالت عظمیٰ نے سوالات کیے لیکن جب نعیم بخاری نے دیکھا کہ ان کی دال نہیں گھل رہی تو انہوں نے اسی میں عافیت جانی کہ میرے خلاف جو درخواست اس کو خود واپس لے لیں، ہمارے لیے عزت کی اس سے بڑی کوئی بات نہیں ہوسکتی۔

شہباز شریف نے کہا کہ مسلم لیگ (ن) کے خلاف سب سے پہلا جو کیس بنایا گیا وہ یہ آشیانہ تھا جس میں مجھے 5 اکتوبر 2018 کو صاف پانی پر بلایا اور آشیانہ پر گرفتار کیا اور پھر ساڑھے پانچ مہینے نیب کے عقوبت خانے میں رہا اور پھر جوڈیشل ریمانڈ پر رہا۔

شہباز شریف نے کہاکہ 14 فروری 2019 کو عدالت عالیہ نے دونوں مقدمات میں میری ضمانت میرٹ پر کی اس کو نیب نے چیلنج کیا تھا اور کل اللہ نے ہمیں سرخرو کیا، اس طرح نیازی نیب گٹھ جوڑ ایک مرتبہ پھر ناکام ہوا۔

انہوں نے کہا کہ مجھے یقین کامل ہے کہ نواز شریف سمیت ان کی ٹیم کا ایک فرد کی بے گناہی سامنے آتی رہے گی اور آرہی ہے اور نواز شریف کی قیادت میں 2014 سے لے کر 2018 تک تمام تر نامساعد حالات کے باوجود ترقی کے منصوبے شروع کیے گئے ان کو پایہ تکمیل تک پہنچایا گیا۔

شہباز شریف نے کہاکہ قوم کو یاد دہانی کے لیے ایک مثال دینا چاہتا ہوں کہ 2014 سے پہلے 20،20 گھنٹے کی لوڈ شیڈنگ ہوتی تھی یہ اتنا بڑا چیلنج تھا تاہم نواز شریف نے 2013 کے انتخابات میں وعدہ کیا تھا اس کو ٹھیک کروں گا اور دن رات محنت کرکے 11 ہزار میگاواٹ بجلی کے منصوبے مکمل کیے۔