مہنگائی کی اڑان جاری، بجلی کی قیمت میں 4 روپے فی یونٹ اضافے کا امکان

اسلام آباد: وزیر اعظم شہباز شریف کی زیر قیادت وفاقی حکومت کے سائے تلے مہنگائی کی اڑان جاری ہے۔ بجلی کی قیمت میں 4 روپے 5 پیسے فی یونٹ اضافے کا امکان ہے۔ نیپرا کی جانب سے فیصلہ آج متوقع ہے۔

تفصیلات کے مطابق نیشنل الیکٹرک پاور ریگولیٹری اتھارٹی (نیپرا) ماہانہ فیول ایڈجسٹمنٹ کیلئے دی گئی درخواست پر فیصلہ آج کرے گی۔ چیئرمین نیپرا بجلی کی قیمت میں 4روپے 5پیسے فی یونٹ اضافے کی منظوری دے سکتے ہیں۔

یہ بھی پڑھیں:

پاکستانی کرنسی کے مقابلے میں امریکی ڈالر کی قیمت میں معمولی کمی

چیئرمین نیپرا انجینئر توصیف ایچ فاروقی بجلی کی قیمت میں اضافے کی درخواست پر عوامی سماعت کریں گے۔ سنٹرل پاور پرچیزنگ ایجنسی نے فیول چارجز ایڈجسٹمنٹ کی مد میں بجلی کی قیمت میں فی یونٹ 4 روپے 5پیسے اضافے کی استدعا کی تھی۔

سی پی پی اے کی جانب سے نیپرا کو دی گئی درخواست میں کہا گیا کہ گزشتہ ماہ ملک بھر میں 12 ارب 55کروڑ یونٹ پیدا کرنے پر مجموعی لاگت 133 ارب روپے آئی۔ ڈیزل سے 27 روپے جبکہ فرنس آئل سے 28روپے فی یونٹ بجلی پیدا ہوئی۔

نیپرا کو دی گئی درخواست میں کہا گیا کہ ایل این جی سے بجلی 16 روپے جبکہ کوئلے سے 14روپے فی یونٹ پیدا ہوئی تاہم لائن لاسز کی نذر ہونے والی بجلی کی لاگت 31روپے فی یونٹ رہی۔ فیول ایڈجسٹمنٹ کی مد میں 3روپے 99پیسے اضافہ بنتا ہے۔

درخواست میں کہا گیا کہ مارچ کے دوران صارفین سے فیول ایڈجسٹمنٹ  کی مد میں وصولی 2روپے 86 پیسے فی یونٹ رہی۔ مارچ کے مقابلے میں جون میں 1 روپے 13 پیسے زیادہ چارج ہوں گے جن کا اطلاق 30 روز کیلئے کیا جائے گا۔