ہر شعبے میں اقرباء پروری ہوتی ہے، اظفر جعفری

اظفر جعفری نے پاکستانی سینما کو ایئرفورس پر مبنی فلم ‘شیر دل اور رومانٹک کامیڈی فلم ‘جانان جیسی فلمیں دیں، اظفر جعفری نے ہارر فلم ‘سیاہ سے اپنے کیریئرکا آغاز کیا اور 2013 میں ‘جانان سے مزید شہرت حاصل کی۔ انہوں نے متعدد شارٹ فلمیں ، میوزک ویڈیو زاور دستاویزی فلمیں بنائیں لیکن کمپیوٹر جنریٹڈ (سی جی) کے پس منظر میں ان کے کام نے فلمی صنعت کو نئی جہتوں سے متعارف کرایا۔

ایم ایم نیوز:آپ کی نظر میں  ہدایت کار کا حقیقی مطلب کیا ہے؟
اظفر جعفری: ہدایت کار بننے کے بعد آپ کے کندھوں پر ذمہ داری عائد ہوتی ہے کہ مستند کہانیوں کی شکل میں لوگوں کے ساتھ علم و دانش کا اشتراک کریں۔

ایم ایم نیوز:بچپن میں آپ کی پسندیدہ فلم کون سی تھی؟
اظفر جعفری: انڈیانا جونز۔

ایم ایم نیوز:آج آپ کا پسندیدہ ہدایتکار کون ہے؟
اظفر جعفری: ڈیوڈ فنچر۔

ایم ایم نیوز:آپ فلمسازی کی طرف کیسے مائل ہوئے؟
اظفر جعفری: بچپن میں مجھے کمپیوٹر گیمز کا بہت شوق تھا اور اینی میشن مجھے بہت زیادہ دلچسپی تھی جسے میں نے پیشے کے طور پر اختیار کیا اورسی جی آرٹسٹ بننے کے بعد براہ راست ایکشن فلموں کے منصوبوں پر کام شروع کیا۔

ایم ایم نیوز: شروع میں آپ کو کن چیلنجز کا سامنا کرنا پڑا؟
اظفر جعفری: جب میں نے ہدایتکاری شروع کی تو انڈسٹری میں انفراسٹرکچر موجود ہی نہیں تھا لہٰذا مجھے اپنے خیالات پر عملدرآمد کرنا بہت مشکل محسوس ہوا۔ مجھے بجٹ یا شوٹنگ کی جگہ کی کمی کی وجہ سے سمجھوتہ کرنا پڑا تاہم میں نے اپنے سی جی کے پس منظر پر انحصار کیا اور میں نے پرانی چیزوں کو دوبارہ بنانے کی بجائے نئی فلموں کو ترجیح د ی۔

ایم ایم نیوز:اپنی فلموں میں اداکاروں کو کاسٹ کرتے وقت آپ ذہن میں کیا رکھتے ہیں؟
اظفر جعفری: اداکاری،موافقت اوررویہ۔

ایم ایم نیوز:فلم انڈسٹری میں اقرباء پروری کے بارے میں آپ کا کیا خیال ہے؟
اظفر جعفری: میرے خیال میں ہر شعبے میں اقرباء پروری ہوتی ہے اگر کسی کو کسی چیز میں مہارت حاصل ہے تو اسے یہ ثابت کرنے کا موقع ملنا چاہئے تاہم غیر متعلقہ شخص کو ہنر اور صلاحیت کے بجائے محض کسی سے واقفیت کی بنیاد پر کام دینا مناسب نہیں ہے۔

ایم ایم نیوز:اسکرین رائٹر کی حیثیت سے آپ کا حتمی مقصد کیا ہے؟
اظفر جعفری: میرا مقصد صرف اتنا ہے کہ جو کچھ بھی حقیقت پسندی سے ممکن ہو اسے ضرور لکھوں لیکن اکثر اوقات صورتحال کو متوازن بنانے کیلئے کئی چیزوں پر سمجھوتہ بھی کرنا پڑتا ہے۔

ایم ایم نیوز:مضبوط اسکرپٹ یا آئٹم سونگ ، جو آپ کے خیال میں سامعین کو متوجہ کرتاہے؟
اظفر جعفری: سامعین جذبات کی طرف راغب ہوتے ہیں لہٰذا ایک مضبوط اسکرپٹ ضروری ہے۔ اگر کسی گانے کو صرف توجہ کے لئے اسکرین پر پیش کیا جاتا ہے تو پھر ظاہر ہے کہ کہانی کمزور ہے۔ اگرچہ کبھی کبھی گانا کہانی کو آگے بڑھانے کے لئے ضروری ہوجاتا ہے تب اس میں کوئی مضائقہ نہیں ہے ۔

ایم ایم نیوز:پاکستان اپنی پہلی 3D فلم بنانے سے کتنا دور ہے؟
اظفر جعفری: ہمارے پاس ٹیکنالوجی موجودہے ہمیں اس کے ساتھ چلنے کے لئے صرف ایک اچھی کہانی کی ضرورت ہے۔ ہمارے پاس پہلے سے 3 ڈی فلمیں تیار ہوچکی ہیں ، جیسے اللہ یار اور لیجنڈ آف مارخور ، جو واضح طور پر ظاہر کرتی ہے کہ ہم کچھ بھی بنانے کی طاقت رکھتے ہیں۔
ایم ایم نیوز:تین چیزیں جو آپ فلم انڈسٹری میں دیکھنا چاہتے ہیں؟
اظفر جعفری: اچھے اسکرین رائٹرز۔تقسیم کا ایک شفاف پلیٹ فارم۔ایک انجمن جو فنکاروں کے حقوق کا تحفظ کرسکے۔