ادلب میں شامی فوج اور مسلح گروپوں کے درمیان خونریز لڑائی، 70 ہلاک

مقبوضہ بیت المقدس: شام کے شمال مغربی صوبہ ادلب میں اسدی فوج اور باغی گروپوں کے درمیان گذشتہ دو روز میں جھڑپوں میں 70 افراد ہلاک ہوگئے ۔

میڈیارپورٹس کے مطابق برطانیہ میں قائم شامی رصدگاہ برائے انسانی حقوق کے سربراہ رامی عبدالرحمان نے ایک بیان میں بتایا کہ ادلب میں اگست میں روس کی ثالثی میں جنگ بندی کے سمجھوتے کے بعد یہ خونریز لڑائی ہے اور مہلوکین میں متحارب فورسز کے جنگجو شامل ہیں۔

صوبہ ادلب میں واقع شہر معری النعمان کے بعض علاقوں میں لڑاکا جیٹ نے انتہا پسندوں اور ان کے اتحادی جنگجوؤں کے ٹھکانوں پر تباہ کن بمباری کی جس کے بعد وہاں سے دھویں کے بادل اٹھ رہے تھے۔

شامی باغیوں نے ان علاقوں پر حال ہی میں قبضہ کیا تھا اور وہاں سے اسدی فوج کو ماربھگایا تھا۔لڑائی سے متاثرہ دیہات کے مکین نقل مکانی کرکے شمال کی جانب جارہے ہیں۔شامی رصدگاہ نے بتایا کہ جاری لڑائی میں انہتر جنگجو اور فوجی مارے گئے ۔

یہ بھی پڑھیں: شمالی شام میں ترکی اور روس کی افواج کے درمیان گولہ باری کا تبادلہ

ان میں چھتیس شامی فوجی یا ان کی اتحادی ملیشیاؤں کے جنگجو ہیں۔شام میں ماضی میں القاعدہ سے وابستہ جنگجو گروپ نے لڑائی کی پہل کی تھی۔اس نے شامی فوج کی مختلف چوکیوں پر حملے کیے تھے جس کے بعد متحارب فورسز میں لڑائی چھڑ گئی تھی۔

شامی فوج نے روس کی فضائی مدد سے اپنے چھن جانے والے علاقوں کو واپس لینے کے لیے رات کو جوابی حملہ کیا تھا اور روسی طیاروں نے باغیوں کے مختلف ٹھکانوں پر تباہ کن حملے کیے۔