گوگل نیوز پر ہمیں فالو کریںنیشنل ڈیزاسٹر مینجمنٹ اتھارٹی نے خبردار کیا ہے کہ ملک بھر میں آج سے 27 اپریل تک شدید گرمی کی لہر جاری رہے گی۔
این ڈی ایم اے کی ایڈوائزری کے مطابق اس دوران شہریوں کو غیر ضروری طور پر باہر نکلنے سے گریز کرنے، پانی کا زیادہ استعمال کرنے اور خصوصی طور پر بچوں، بزرگوں اور مریضوں کو احتیاط برتنے کی ہدایت کی گئی ہے۔
ادارے نے واضح کیا ہے کہ آنے والے دنوں میں گرمی کی شدت مزید بڑھ سکتی ہے جس سے مختلف صحت کے مسائل پیدا ہو سکتے ہیں۔
ادھر محکمہ موسمیات کا کہنا ہے کہ منگل کے روز ملک کے بیشتر علاقوں میں موسم گرم اور خشک رہے گا تاہم کشمیر، گلگت بلتستان اور بالائی خیبر پختونخوا کے چند مقامات پر آندھی، گرج چمک اور بارش کا امکان موجود ہے۔
بدھ کے روز بھی عمومی طور پر موسم گرم رہے گا البتہ کچھ بالائی علاقوں میں جزوی ابر آلود موسم رہنے کی پیشگوئی کی گئی ہے۔
گزشتہ 24 گھنٹوں کے دوران سب سے زیادہ درجہ حرارت جیکب آباد میں ریکارڈ کیا گیا جو 43 ڈگری سینٹی گریڈ رہا۔
دیگر شہروں میں بھی شدید گرمی دیکھی گئی، جیسے مِٹھی، بہاولنگر اور نوابشاہ میں 42 ڈگری، کراچی، قصور اور لسبیلہ میں 41 ڈگری، لاہور میں 38، اسلام آباد میں 36، پشاور میں 35، مظفرآباد میں 33، کوئٹہ میں 25 اور گلگت میں 22 ڈگری سینٹی گریڈ ریکارڈ کیا گیا۔
ماہرین کا کہنا ہے کہ گرمی کی یہ لہر نہ صرف انسانی صحت بلکہ زراعت اور پانی کی فراہمی پر بھی اثرانداز ہو سکتی ہے، اس لیے بروقت احتیاطی تدابیر اختیار کرنا بے حد ضروری ہے۔
