قومی اسمبلی اجلاس کا ایجنڈا جاری، ملک کے نئے وزیر اعظم کا انتخاب آج ہوگا

اسلام آباد: قومی اسمبلی اجلاس کا ایجنڈا جاری کردیا گیا جس کے مطابق ملک کے نئے وزیر اعظم کا انتخاب آج ہوگا۔ تحریکِ انصاف کے امیدوار شاہ محمود قریشی اور متحدہ اپوزیشن کے متفقہ امیدوار شہباز شریف کے مابین کڑا مقابلہ متوقع ہے۔

تفصیلات کے مطابق قومی اسمبلی کے آج ہونے والے اجلاس کا ایجنڈا جاری کردیا گیا ہے جس کے تحت ایوان آئین کی شق 91 کے زیرِ سایہ نئے وزیر اعظم کا انتخاب کرے گا۔ایوانِ زیریں کا اجلاس آج دن 2 بجے پارلیمنٹ ہاؤس میں منعقد ہوگا۔ 

یہ بھی پڑھیں:

شہباز کے کاغذات نامزدگی پر اعتراضات نہ مانے گئے تواستعفیٰ دیدینگے، فواد 

خیال رہے کہ 9 اور 10 اپریل کی درمیانی شب متحدہ اپوزیشن کی وزیر اعظم عمران خان کے خلاف تحریکِ عدم اعتماد 174 ووٹوں سے کامیاب رہی جس کے نتیجے میں پی ٹی آئی کے چیئرمین وزارتِ عظمیٰ سے سبکدوش ہو گئے۔

چیئرمین پی ٹی آئی عمران خان نے راتوں رات وزیر اعظم ہاؤس چھوڑ کر بنی گالہ کا رخ کر لیا۔ گزشتہ روز تحریکِ انصاف کی جانب سے شہباز شریف کیلئے میدان خالی نہ چھوڑنے کا فیصلہ سامنے آیا۔ سابق وزیر خارجہ نے کاغذاتِ نامزدگی جمع کرادئیے۔

قبل ازیں 3 اپریل کو ڈپٹی اسپیکر قومی اسمبلی قاسم خان سوری نے تحریکِ عدم اعتماد مسترد کرتے ہوئے قومی اسمبلی اجلاس ملتوی کردیا جس پر سپریم کورٹ نے از خود نوٹس لے کر وزیر اعظم کی جانب سے تحلیل کی گئی قومی اسمبلی بحال کردی تھی۔