عوام نے امپورٹڈ حکومت کی نااہلی کی قیمت ادا کرنی شروع کردی، عمران خان

اسلام آباد: سابق وزیراعظم اور پاکستان تحریک انصاف کے چیئرمین عمران خان نے حکومت پر تنقید کرتے ہوئے کہا کہ عوام نے امپورٹڈ حکومت کی نااہلی کی قیمت ادا کرنی شروع کردی۔

سماجی رابطے کی ویب سائٹ ٹوئٹر پر اپنے پیغام میں سابق وزیراعظم نے کہا کہ پٹرول اور ڈیزل کی قیمتوں میں 20 یا 30 روپے فی لٹر اضافے، جوہماری تاریخ کا سب سے بڑا یک مشت اضافہ ہے، کے ساتھ قوم نے امپورٹڈ سرکار کی بیرونی آقاؤں کی غلامی کی قیمت ادا کرنا شروع کردی ہے۔

اس کے برعکس امریکہ کےسٹریٹیجیک شراکت دار بھارت نے روس سے سستا تیل خرید کر ایندھن کی قیمتوں میں 25 روپے فی لٹر کمی کی ہے۔ ہماری قوم اب مجرموں کے اس گروہ کے ہاتھوں مہنگائی کا ایک بڑا طوفان بھگتے گی۔

— Imran Khan (@ImranKhanPTI) May 26, 2022

انہوں نے کڑی نکتہ چینی کرتے ہوئے کہا کہ نااہل اور بے حس حکومت نے روس کے ساتھ ہمارے معاہدے کو آگے نہیں بڑھایا، حکومت نے بیرونی آقاؤں کی ایما پر پٹرولیم مصنوعات کی قیمتوں میں اضافہ کیا۔

یہ بھی پڑھیں: شہری ہوجائیں تیار، حکومت نے پیٹرول کے بعد آٹا بھی مہنگا کردیا

عمران خان نے کہا کہ اس کے برعکس امریکہ کے اسٹریٹیجیک شراکت دار بھارت نے روس سے سستا تیل خرید کر ایندھن کی قیمتوں میں 25 روپے فی لٹر کمی کی ہے۔ ہماری قوم اب مجرموں کے اس گروہ کے ہاتھوں مہنگائی کا ایک بڑا طوفان بھگتے گی۔

خیال رہے کہ گزشتہ روز وفاقی حکومت نے مہنگائی میں پسے ہوئے عوام پر پیٹرول بم گرا دیا، پٹرول اور ڈیزل کی کی قیمت میں 30 روپے فی لٹر اضافہ کرنے کا اعلان کردیا گیا۔

پریس کانفرنس کرتے ہوئے وفاقی وزیر خزانہ مفتاح اسماعیل نے کہا تھا کہ پٹرولیم مصنوعات کی قیمتیں بڑھائے بغیر آئی ایم ایف پروگرام نہیں مل سکتا،پٹرول، ڈیزل اور کیروسین آئل 30 روپے مہنگا ہوگا، فیصلے کا اطلاق آج رات 12 بجے سے ہوگا۔

وفاقی وزیر خزانہ مفتاح اسماعیل نے کہا کہ آئی ایم ایف نے پٹرول کی قیمت بڑھانے تک ریلیف سے انکار کیا ہے، عمران خان کے فارمولا پر جاؤں تو پٹرول 205 روپے لیٹر ہو جائے گا۔

وفاقی وزیر خزانہ نے سماجی ابطے کی ویب سائٹ ٹویٹر پر لکھا کہ پٹرول کی نئی قیمت 179 روپے 86 پیسے فی لٹر، ڈیزل کی فی لٹر قیمت 174 روپے 15 پیسے ہو گئی ہے۔

انہوں نے کہا تھا کہ سابق حکومت کی پالیسیوں کے باعث آج مشکلات کا سامنا ہے، سابق حکومت نے پٹرول اور ڈیزل کی قیمت کو فکس کیا، عوام پر کسی بھی قسم کا بوجھ ڈالنا ہمارے لیے مشکل فیصلہ تھا۔