نریندر مودی کا مقبوضہ وادی کا دورہ، لائن آف کنٹرول کے دونوں اطراف یومِ سیاہ

سری نگر: مقبوضہ جموں و کشمیر میں آج بھارتی وزیر اعظم نریندر مودی کے دورے کے موقعے پر یومِ سیاہ منایا جارہا ہے ۔ اس موقعے پر لائن آف کنٹرول (ایل او سی) کے دونوں جانب ہڑتال کی گئی۔

تفصیلات کے مطابق کل جماعتی حریت کانفرنس (اے پی ایچ سی) نے مقبوضہ وادی میں ہڑتال کی کال دے دی۔ غیر قانونی طور  پر مقبوضہ جموں و کشمیر میں نریندر مودی کے متنازعہ دورے کے خلاف اتوار کے روز مظفر آباد میں دھرنا دیا گیا۔

یہ بھی پڑھیں:

اقوام متحدہ کے سیکریٹری جنرل کاجنگ بندی کیلئے روس اور یوکرین کے صدور سے ملاقات کا فیصلہ

احتجاجی دھرنا پاسبانِ حریت کے زیر اہتمام برہان وانی چوک پر دیا گیا۔ دھرنے کے شرکاء نے ہاتھوں میں یومِ سیاہ کی مناسبت سے سیاہ پرچم تھام رکھے تھے۔ آل پارٹیز حریت کانفرنس نے جموں و کشمیر پر بھارت کا غیر قانونی قبضہ مسترد کردیا۔

اپنے ایک بیان میں اے پی ایچ سی حریت رہنماؤں کا کہنا ہے کہ ہم جموں و کشمیر پر بھارت کے غیر قانونی قبضے کی مذمت کرتے ہیں۔ بھارتی وزیر اعظم نریندر مودی کے دورے کے موقعے پر وادی میں مظاہرے کیے جائیں گے۔

دریں اثناء آزادجموں و کشمیر کے وزیر اعظم سردار تنویر الیاس نے اپنے ایک ویڈیو بیان میں کہا کہ بھارتی قیادت نے پورے خطے کا امن خطرے میں ڈال دیا ہے۔ اسلام آباد اور آزاد کشمیر کے تمام شہروں میں بھارتی اقدامات کی مذمت کیلئے مظاہرے ہوں گے۔