تحریک عدم اعتمادناکام بنانے کیلئے اسپیکر کا باغی ارکان اسمبلی کو ملک سے نکالنے کا منصوبہ

اسلام آباد:اپوزیشن جماعتوں کی جانب سے وزیراعظم عمران خان کے خلاف تحریک عدم اعتماد کو ناکام بنانے کے لیے اسپیکر قومی اسمبلی اسد قیصر نے اپنے ارکان کو مختلف غیر ملکی دوروں پر بھیجنے کا پلان تیار کرلیا ہے۔

ذرائع کے مطابق تقریباً 45 سے 50 اراکین قومی اسمبلی کو رواں ماہ بعض یورپی اور عرب ممالک کے دورے کی پیشکش کی گئی ہے۔ اسپیکر نے ایم این ایز کے آٹھ گروپ بنائے ہیں اور ویزا کے عمل کے لیے ان کے پاسپورٹ مانگے ہیں۔

مزید پڑھیں:غصہ، اشتعال، دھمکیاں، گالیاں، زبان درازی، گھبرا گئے ہو نا، مریم نواز

ارکان برطانیہ، انڈونیشیا، بلجیم ، عراق، ترکی، پولینڈ اور ڈنمارک کا دورہ کریں گے، ذرائع کا کہنا ہے کہ اپوزیشن ارکان کو بھی وفد کا حصہ بننے کی دعوت دی گئی ہے تاہم نواز لیگ نے اپنے اراکین کو ایسے غیر ملکی دوروں میں شرکت سے روک دیا ہے۔

ذرائع نے یہ بھی بتایا کہ جن حکومتی ارکان پر شک ہے انہیں بھی ان غیر ملکی دوروں کا حصہ بنایا جا رہا ہے۔ ذرائع کا مزید کہنا ہے کہ اراکین اسمبلی کو مفت عمرہ کی سہولت فراہم کرنے کے منصوبے پر بھی مشاورت جاری ہے۔