گوگل نیوز پر ہمیں فالو کریںسڈنی کرکٹ گراؤنڈ میں آج ہونے والے جنوبی افریقہ کے خلاف میچ کیلئے فخر زمان انجرڈ ہونے کے باعث دستیاب نہیں ہوں گے۔ فخر زمان کی جگہ محمد حارث کو پاکستانی اسکواڈ کا حصہ بنا لیا گیا۔
تفصیلات کے مطابق نیدر لینڈز کے خلاف کھیلے گئے میچ میں فخر زمان انجری کا شکار ہو کر ایک بار پھر اَن فٹ ہو گئے۔ سابق اوپنر کی جگہ نوجوان بیٹر محمد حارث لے لیں گے۔ آئی سی سی ایونٹ ٹیکنیکل کمیٹی کی جانب سے منظوری مل گئی۔
ورلڈ کپ کا اہم میچ، پاکستان اور جنوبی افریقہ کا مقابلہ آج ہوگا
گزشتہ روز فخر زمان کو گھٹنے میں چوٹ آئی، قومی کرکٹ ٹیم کے ڈاکٹر نجیب سومرو نے تکنیکی رائے دیتے ہوئے کہا کہ فخر زمان مکمل طور پر فٹ نہیں ہوئے تھے کہ انہیں نیدر لینڈز کے خلاف میچ کھلا دیا گیا۔
ڈاکٹر نجیب سومرو نے واضح کیا کہ فخر زمان کو نیدر لینڈز کے خلاف کھلانا رسک تھا۔ آئی سی سی نے فخر زمان کی جگہ محمد حارث کو نامزد کرنے کی منظوری پاکستان کی ٹیم مینجمنٹ کی جانب سے خط موصول ہونے پر دی۔
خیال رہے کہ آج پاکستان کا مقابلہ ورلڈ کپ کی اب تک ناقابلِ شکست رہنے والی ٹیم جنوبی افریقہ سے ہے۔ جیت کی صورت میں سیمی فائنل کی دوڑ میں شامل رہنے کے امکانات میں اضافہ ہوسکتا ہے تاہم میچ ہارنے کی صورت میں پاکستان ورلڈ کپ سے باہر ہوجائے گا۔
